Кербұлақ ауданында тазалық жұмыстары қарқын алып, «Таза Қазақстан» акциясы аясында ауқымды жұмыстар атқарылуда.
Жетісу облысы әкімдігінің 2025 жылғы 31 наурыздағы №88 қаулысына сәйкес облыс аумағында көктемгі-күзгі санитарлық тазарту, абаттандыру және көгалдандыру айлығы бастау алған болатын. Аталған бастама аясында ауданда бірқатар маңызды іс-шара жүзеге асуда.
Наурыз айынан бастап өңірде «Таза Қазақстан» экологиялық акциясы шеңберінде 12 іс-шара ұйымдастырылды. Бұл жұмыстарға ауданның барлық елді мекені тартылып, тұрғындар белсенділік танытты. Жалпы саны 2760 адам санитарлық тазалық жұмыстарға қатысып, 840 тонна қоқыс арнайы техника көмегімен шығарылды. Бұл жұмыстарға 180 техника бірлігі жұмылдырылған.
Аудан аумағындағы жол жиектеріндегі шарбақтар сырланып, ағаштар әктелді. Сонымен қатар, жаяу жүргіншілер жолы тазаланып, су өткелдері мен арық жүйелеріне санитарлық тазарту жұмыстары жүргізілді.
Тазалық – тек қоршаған ортаның көркем келбетін қалыптастыру ғана емес, ол – тұрғындардың өмір сапасына тікелей әсер ететін маңызды мәселе. Осы ретте аудан тұрғындарының бірлігі мен белсенділігі ерекше атап өтуге тұрарлық. Аталған жұмыстар жыл соңына дейін жалғасып, өңірдің көркеюіне үлес қоспақ.
Раушан Бисембекова,
Кербұлақ ауданы әкімінің баспасөз хатшысы
