Тағы да өзекті мәселе. Ол – бөлінген бюджетке қарамастан шығармашылық тапсырыс желісі бойынша үйірмелерге ваучерлер бермеу.
Ата-аналар балаларын жеке шығармашылыққа жаза алмайды, кәсіпкерлер қызмет көрсете алмайды, ал жергілікті мемлекеттік органдар нақты мерзімдер мен түсініктемелер бермейді. «Атамекен» өңірлік кәсіпкерлер палатасына жеткізушілер қауымдастығының қаржыландыру проблемалары туралы өтініші келіп түсті.
Мәселе кәсіпкерлердің құқықтарын қорғау және сыбайлас жемқорлыққа қарсы іс-қимыл кеңесінің отырысында қаралды.
Кәсіпкерлер 2023 жылы облыста жан басына шаққандағы қаржыландыру бағдарламасы аясында 830 миллион теңгеден аса игерілмеген қаражат бюджетке қайтарылғаны туралы ақпарат берді. Оның басым бөлігі – шығармашылық тапсырыс қаражаты. ArtSportEdu жеткізушілер қауымдастығы деректері бойынша да осындай жағдай қайталануда.
Белгілі болғандай, ArtSport платформасынан Damu Bala-ға көшу кезінде балалардың бұрын қалыптасқан кезегі жойылған. Бұл «тең қолжетімділік» және әділеттілік қағидатына күмән келтірді. Бүгінгі таңда 8 мыңнан аса бала тіркелген, алайда ваучерлер ешқашан берілмеген. Облыс кәсіпкерлері, қоғам қайраткерлері және кәсіпкерлер палатасы өкілдерінің бірлескен кездесуінде прокуратура мен сыбайлас жемқорлыққа қарсы ведомство тарапынан аталған жағдайды тексеру ұсынылды.
Сондай-ақ, мәдениет басқармасының тек бөлімдерімен ғана емес, басшылықтың қатысуымен жұмыс кездесулерін ұйымдастыру, қалыптасқан жағдайдың себептерін негізге ала отырып, кеңейтілген анықтама дайындау, облыс әкімінің деңгейіне шығару мәселесін қарау, қажет болған жағдайда жергілікті атқарушы органдар деңгейінде де, республикалық құрылымдардың қолдауымен де жан басына шаққандағы қаржыландырудың қолданыстағы ережелеріне өзгерістер енгізуге бастамашылық жасау ұсынылды.
Қызмет көрсетушілер бұл мәселенің жүйелі сипатта екенін, жүздеген отбасы мен ондаған шағын бизнес субъектілеріне қатысты екенін және назардан тыс қалдырылмайтынын баса айтты. Соңында кездесуге қатысушылар тарапынан егер бюджет бөлінсе, ал балалар үйірмелерге бара алмаса – бұл жүйенің істен шығуы туралы белгі және оны қолхаттармен емес, шешімдермен жою қажет екені сөз етілді.
Айгүл БАЙБОСЫНОВА
