Саябақ атауын алған «Қойтас» — Сарқан өңіріне тән табиғи ерекшелігімен дараланады. Мұндағы тастардың әртүрлі пішіндері кең жайлауда жайылып жүрген қойларға ұқсайды, сондықтан жергілікті халық оларды «Қойтас» деп атайды. Кезінде алапат тасқынның күші төскейге шығарып тастаған тас тұғырлар бүгін қалың ел тамашалайтын көрнекті орынға айналды.
2021 жылы құрылған Қойтас саябағының жалпы аумағы 6 гектарды құрайды. Саябақта келесі нысандар орналасқан: жаяу жүргіншілер жолдары, футбол және спорт алаңдары, скейтборд және стрит воркаут, балалар ойын алаңдары, демалыс орындықтары, күркелер және жарық шамдары. Таңғы, кешкі серуенге шыққан үлкендер жаяу жүргіншілер жолымен жүріп, балдырғандардың шат күлкісіне куә болады.
Саябақта 400 қарағай мен 200 түрлі ағаш-бұта отырғызылып, тамшылатып суару жүйесі орнатылған.
Болашақта саябақта 500 орындық амфитеатр мен сахна безендіру, сондай-ақ қайық стансысы бар жасанды көл салу жоспарлануда. Бұл жобалар табиғи ландшафтты сақтай отырып, тұрғындардың демалыс сапасын арттыруға бағытталған.
Қойтас саябағы Сарқан ауданының туризмін дамытуда маңызды рөл атқарады. Жетісу өңірінің табиғи сұлулығын тамашалауға келген туристер үшін бұл саябақ ерекше тартымды орын болмақ.
Жақсылық ИГІМАН
