Жер бетінде қамқор, мейірімді, қайырымды халықтың бірі – қазақ деп нық сеніммен айта аламын. Мұндай асыл қасиет біздің қанымызға ата-бабаларымыздан берілгеніне қуатты қуанамын.
Қазіргі таңда болып жатқан төтенше жағдай бәрімізге ауыр тиіп жатқаны рас. Бірақ, сабыр сақтауға міндеттіміз. «Сабыр түбі – сары алтын» екенін атам қазақ о баста-ақ біліп айтып кетті емес пе? Олай болса сабырлық танытайық, ағайын.
Төтенше жағдайға байланысты облыстың жастары өте ауқымды шара атқарып жатыр. Мұқтаж жандарға, көпбалалы отбасыларға, біз сияқты зейнеткерлерге қолдарынан келгенше көмек көрсетуде. Біздің болашағымыз саналған жастарымызға көп рахмет айтқым келеді. Күні кеше ғана шаңырағыма бір топ жас келіп, азық-түлік, медициналық бетперде, тұрмысқа қажетті ұсақ-түйек заттар беріп кетті. «Біз біргеміз!» деген қорап сыртындағы бірауыз сөздің өзі ауызбіршілігіміз бен берекемізді еселеп жібергендей көрінді. Осындай қиын күнде қамқорлық танытқандарына қуанып, көзіме жас алдым. Қамкөңіл жандардың көңілін аулаған барлық отандасыма Жаратқан амандық берсін деп тілеймін.
Зәуре ИСАБАЕВА
