Қазіргі таңда ғаламторға деген тәуелділік артып тұр. Оған себеп әлеуметтік желі мен түрлі ойындар.
Көп адам әлеуметтік желіні хабар алмасу үшін пайдаланса, енді бірі қызық көріп, алтын уақыттың қадірін кетіріп жүр десек қателеспеспіз.
Ғаламторды дұрыс пайдалану арқылы ақша табуға болады. Білімін дамытып, шет тілдерді үйреніп, пайдасына жарататындар да жоқ емес. Одан бөлек кез келген кітаптің электрондық нұсқасын оқуға болатын да мүмкіндіктің барын айта кеткеніміз жөн. Бірақ бұрынғыдай кітапханаға барып, кітап оқып отырған жастарды сирек кездестіреміз. Мұны телефонның пайдалы тұсы деп қарауымыз керек. Бұрын оқитын кітап тапасақ, қазір қаптаған кітапты оқитын оқырманның жоқтығы көңілге көлеңке ұялатады.
Телефонға деген тәуелділікті жоюдың сан мыңдаған түрі бар. Мамандар телефонға деген тәуелділік ең бірінші денсаулыққа зиян екенін айтып, дабыл қағуда. Бірақ оған құлақ асып, көңіл бөліп жатқандар шамалы.
Жасөспірімдер әлеуметтік желіні өз пайдасына жаратпайды деп айту да дұрыс емес. Жастармен жағаласып, жасамыстар да осы ауылдың тұрақты тұрғынына айналғаны қынжылтады. «Батыстың әжесі» деген лақап атпен желіккен жастармен желіде отыратын әжелердің қатары да көбейді. Өкінішті-ақ. Ал біз «әже» дегенде көз алдымызға ақ кимешек киген, әдемі қартайған, қалтасына құрт пен тәтісін салған әже елестейді. Немерелерді жанына жинап, ертегі айтып, маңдайымыздан мейірлене сүйіп отыратын әжелерді қазір кездестіру тым қиындап кетті. Бұл ащы да болса шындық. Бүгінгінің әжесі әлеуметтік желінің жетегінде кеткені ұят-ақ. Ақша таппасын демейміз, бірақ халыққа пайдалы дүниелер түсірсе нұр үстіне нұр болар еді.
Қазірден бастап әлеуметтік желіге деген тәуелділіктен арылмасақ, өз-өзімізді жоғалтып, денсаулығымызды құртып алуымыз әбден мүмкін. Сондықтан әр нәрсенің тек өзімізге пайдалы жақтарын қолдана білуіміз қажет.
Зарина БЫЖЫБЕК,
Жетісу университетінің 3 курс студенті
Фото: azattyq-ruhy.kz
