Жуырда әлемнің екінші ұстазы атанған әл-Фарабидің 1150 жылдық мерейтойына арналған «Білім беруді цифрландыру жағдайында әл-Фарабидің педагогикалық тұжырымдамасының заманауи интерпретациясы» атты әл-Фараби атындағы Қазақ ұлттық университетінің 50-ші Халықаралық ғылыми-әдістемелік конференциясы аясында «Түлектің заманауи моделі» тақырыбында «дөңгелек үстел» өтті.
«Дөңгелек үстел» жұмысы екі кезеңнен тұрды. Біріншісі жұмыс берушілермен бірлесіп ҚР Президенті архивінде өтті. Аталмыш шараға ҚР Президенті архивінің, ҚР Орталық Мемлекеттік ғылыми-техникалық құжаттама архивінің, ҚР Орталық Мемлекеттік кино-фотоқұжаттар мен дыбыс жазбалар архивінің, Алматы қаласының Орталық Мемлекеттік Архивінің қызметкерлері және әл-Фараби атындағы ҚазҰУ оқытушылары, докторанттары мен магистранттары, Алматы көпсалалы колледж оқытушылары, кітапхана қызметкерлері қатысты.
«Дөңгелек үстелдің» бірінші кезеңінде «Мұрағаттану, құжаттану және құжаттаманы басқаруды қамтамасыз ету» білім бағдарламаларының нәтижелері талқыланып, бітіруші түлектің құзыреттілік модельдері қарастырылды. ҚР Президенті Архиві директорының орынбасары Қ. Әлімғазинов ҚР Президенті Архиві мен әл-Фараби атындағы ҚазҰУ арасындағы әлеуметтік серіктестік туралы, бүгінде ҚазҰУ түлектері ҚР Президенті Архивінің басым бөлігін құрайтындығын, архив базасында «Архив ісі және құжаттану» оқу-өндірістік кафедрасы ашылғандығын, архив жұмыс беруші ретінде сапалы жас мамандарды дайындауға атсалысып жатқандығын айтып өтті. Жұмыс берушілермен өткен әдістемелік «дөңгелек үстел» аясында университет жанынан «Мұрағаттану, құжаттану және құжаттаманы басқаруды қамтамасыз ету» мамандығы бойынша реставрациялық оқу лабораториясын ашу туралы ұсыныс жасалды.
«Дөңгелек үстелдің» екінші кезеңінде университетті бітірген түлектермен кездесу өткізілді. Түлек моделі дегеніміз жоғары кәсіптік оқу орны түлегінің маманның жеке қасиеттерінің жүйесі, мақсаты, білім беру жүйесі қызметінің нәтижесі. Осы тұрғыдан алғанда қазіргі кезеңдегі түлектің құзыреттілік моделін жасау мақсатында түлектер моделін құрудың принциптері, модельде түлектің дүниетанымдық қасиеттері қандай болуы керек, оқу нәтижелері арқылы түлектердің моделінде кәсіби қызметтің қандай бағыттары, түрлері, нысандары көрініс таба алады, білім беру бағдарламасының түлегі жасайтын кәсіби өнімдерді қандай принцип бойынша анықтау керек, цифрландыру жағдайында бітіруші түлек қандай жаңа сандық технологияларды қолдана алады, құзыреттіліктің қалыптасуын тиісті бағалау үшін оқу процесіне бағалаудың қандай жаңа нысандары енгізілуі керек деген мәселелер бойынша пікір алмасылды. Түлектің бірегей құзыреттілік моделін жұмыс берушілер талаптарына сәйкес даярлау үшін білім беру бағдарламаларын үйлестіру қажеттілігі көрсетілді.
Н. Алпысбаева,
әл-Фараби атындағы ҚазҰУ-дің
проф. м.а., тарих ғылымдарының кандидаты
А. Есеболат,
әл-Фараби атындағы
ҚазҰУ-дің 2-курс
магистранты
