Жас спортшылар FAI әлем кубогының қазақстандық кезеңі саналатын «Қорқыт Ата» кубогы және Байқоңыр ғарыш айлағының кубогында бақ сынады.
Жарыс қарсаңында Байқоңыр ғарыш айлағына Беларусь, Қазақстан, Қырғызстан, Ресей, Тәжікстан және Өзбекстаннан 120-ға жуық спортшы зымыран модельдеу саласындағы өз шеберліктері мен жетістіктерін көрсетуге келді.
Ақыл аламаны «s3a» (парашют үлгілері), «S4A» (зымыран ұшақтары), «S6A» (стримерлік үлгілер), «S8P» (радио басқарылатын зымыран ұшақтары) және «S9A» (роторлы үлгілер) сияқты зымыран түрлері бойынша өрбіді.
Қазақстанның атынан Алматы қаласынан келген «Барыс» командасы қатысты. Топ құрамында «Жас сарбаз» республикалық балалар-жасөспірімдер әскери-патриоттық қозғалысының тәрбиеленушілері Даниил Гашев, ағайынды Владимир және Дмитрий Биктимировтар бар.
Тартысқа толы сайыста олар «Қорқыт Ата» Кубогы үшін таласта командалық есепте «S9A» түрі бойынша және «S8p» түрінен Байқоңыр ғарыш айлағы Кубогында қола жүлдегер атанды.
Командалық жеңістерден бөлек жекелеген жетістіктерге қол жеткізген Владимир Биктимиров «s9a» үлгісінде күміс медаль иеленсе, ал оның ағасы Дмитрий сол санатта қоланы қанжығалады.
– Бұл жарыста біз тек күшімізді сынап қана қоймай, космновтика ғылымының қыр-сырына қанықтық. Қазақстанды жоғарғы деңгейде таныстырғанымызға қуаныштымыз, — дейді Владимир Биктимиров.
Балалар Алматы жолаушылар көлігі және коммуникациялар колледжінің Smart Sarbaz сыныбында оқиды. Оларды әуе және зымыран ғылымының оқытушысы (fpvschool.kz) Владислав Барышев жаттықтырады. Бұл қызмет бағытына Алматы қаласының қорғаныс істері жөніндегі департаменті елеулі қолдау көрсетіп келеді.
Халықаралық деңгейдегі осындай нәтижелер зымыран үлгілерін құрастырумен, дайындаумен айналысатын қазақстандық шебер спортшылардың қалыптасып келе жатқанын айғақтайды.
