ҚР Қорғаныс министрлігі Қарулы Күштерді қаржыландыру туралы айтып, олардың қазіргі уақыттағы жауынгерлік тиімділігін де бағалады, — деп хабарлайды 7-su.kz желілік басылымы.
Ведомствоның Tengrinews.kz редакциясының ресми сауалына берген жауабына сәйкес, бүгінде Қазақстан Қарулы Күштері шынымен де қосымша қаржыландыруды қажет етеді.
«Республикалық бюджеттің мүмкіндіктерін ескере отырып, Қорғаныс министрлігінің 2025 жылға арналған шығыстарын республикалық бюджет комиссиясы ЖІӨ-нің 0,68 пайызы мөлшерінде қолдады. Қосымша қажеттілік бар. Бұл мәселе 2025 жылғы бюджетті нақтылау кезінде қаралады», — деп хабарлады Қорғаныс министрлігі.
Сондай-ақ, ведомство елдің қазіргі уақыттағы жауынгерлік қабілетін де бағалады.
«Қазақстан Республикасының әскери доктринасына сәйкес, республиканың әскери қауіпсіздігін қамтамасыз ету қорғаныс сипатында және Қазақстанның ұлттық мүдделерді қорғау үшін дипломатиялық, саяси, құқықтық, экономикалық және басқа да әскери емес құралдарды басымдықпен пайдалануға бейілділігін көрсетеді. Қазақстан Республикасы мемлекеттердің ешқайсын жау ретінде қарастырмайды», — делінген жауапта.
Армияның жауынгерлік қабілетін арттыру мақсатында оқыту және жаттығу жүйесі белсенді түрде жетілдіріліп жатыр, әскери қызметшілерді даярлаудың заманауи әдістері мен технологиялары енгізіліп жатыр. Жауынгерлік дағдылар мен тактикалық дайындықты жақсартуға ерекше назар аударылады, бұл біздің Қарулы Күштерімізге әртүрлі жағдайларда тиімді әрекет етуге және өзгермелі ортаға бейімделуге мүмкіндік береді.
«Халықаралық әскери ынтымақтастық және көпұлтты оқу-жаттығуларға қатысу белсенді дамып келеді, бұл тәжірибе алмасуға және серіктестермен өзара іс-қимылды жақсартуға ықпал етеді. Бұл бастамалар өз Қарулы күштеріне деген сенімділікті, армиямыздың ұлттық мүдделерді тиімді қорғау және халқымыздың қауіпсіздігін қамтамасыз ету қабілетін нығайтуға бағытталған», — деп қосты министрлік.
Қазақстанның Қарулы Күштерінің жауынгерлік әзірлігін арттыру және жаңғырту жөніндегі стратегия ХХІ ғасырдың сын-қатерлерімен күресуге қабілетті заманауи, мобильді және қуатты армия құруға, сондай-ақ тез өзгеретін геосаяси жағдай жағдайында ұлттық қауіпсіздікті қамтамасыз етуге бағытталғаны айтылды.
Фото ©️ Tengrinews.kz
