Талдықорған қаласында кәмелетке толмағандардың істері жөніндегі учаскелік полиция инспекторларымен, есірткі қылмысына қарсы іс-қимыл басқармасының және облыстық білім басқармасы қызметкерлерімен бірлескен рейдтік іс-шаралар жүргізілді, деп хабарлайды 7-su.kz желілік басылымы.
Жетісу облысы ПД Баспасөз қызметі хабарлағандай аталмыш рейд жасөспірімдер арасындағы қылмыс пен құқық бұзушылықтың, сондай-ақ нашақорлықтың, түнгі уақытта ойын-сауық орындарда және көшелерде заңды өкілдерінсіз болуының алдын алу, зорлық-зомбылыққа қарсы әрекет жасауға бағытталған.
Іс-шара облыстың барлық аудандарын қамтыды. ІІО-да есепте тұратын қолайсыз отбасын және кәмелетке толмағандардың тұрғылықты мекен-жайлары тексерілді.
Нәтижесінде түнгі уақытта ойын-сауық орындарда заңды өкілдерінсіз болғандары үшін – 1, алкогольді өнімдерді 21-жасқа толмаған тұлғаға сатқандары үшін – 1, түнгі уақытта көшеде заңды өкілдерінің еріп жүруінсіз болғандары үшін – 30 әкімшілік құқық бұзушылық анықталды.
Жалпы жыл басынан жасөспірімдер арасындағы қылмыстың алдын алуға әсерін тигізетін 964 құқық бұзушылық анықталып, жолы кесілді.
Осындай рейдтік іс-шаралар күнделікті, әсіресе жұма-жексенбі күндері аралығында күшейтілген режимде өткізілетін болады.
