Күні кеше Алматыдағы Жазушылар үйінде «Қазақ әдебинетінің көктемі» атты әдеби жыл қорытындысы өтті. Алқалы басқосуды Қазақстан Жазушылар одағы басқарма төрағасының орынбасары Бауыржан Жақып жүргізіп отырды.
Мемлекеттік Гимн орындалғаннан кейін жиналған жұртшылық былтырғы мен биылғы жылдың аралығында бақилық болған қаламгерлерді еске алып, бір минут үнсіздік жарияланды. Осыдан кейін 2021 жылы жарық көріп, оқымандарға жол тартқан кітаптар жайлы баяндамашыларға кезек берілді. Атап айтқанда, «Балалар әдебиеті:поэзия» мәселесін Асылан Тілегенов, «Балалар әдебиеті: проза» бойынша Ерқанат Хуатбекұлы, «Балалар әдебиеті: драматургия» – Мәншүк Тәшімова, жалпы поэзия тақырыбын Шәмшия Жұбатова, жастар поэзиясын – Шоқан Мұратхан, прозаны – Мағира Қожахметова, жастар прозасын – Өміржан Әбдіхалық, деректі прозаны – Өтеш Қырғызбаев, әдеби сынды – Жанғара Дәдебаев, драматургияны – Мұқан Амангелді, аударманы – Лаура Дәуренбекова, сатираны – Нұрлыбек Жұбатқан, шет елдегі қазақ әдебиетін – Армиябек Сағындықұлы, орыс тілді әдебиетті – Любовь Шашкова, ұйғыр тілді әдебиетті – Авуд Масимов жан-жақты талқылаудан өткізді.
Әдеби жыл қорытындысы жиыны барысында қазақтың талантты ақыны, марқұм Есенғали Раушановтың Лондоннан жарық көрген «Құстар біздің досымыз» атты кітабының таныстырылымы мен дүниеден тым ерте озған дарынды жазушы Аягүл Мантайдың «Уақыттың көз жасы» деп аталатын жаңа кітабының тұсаукесері өтті. Жиынның соңында дәстүр бойынша Жазушылар одағына жаңа мүшелер қабылданып, 20-ға жуық қаламгер халықаралық «Алаш» әдеби сыйлығымен марапатталды. Олардың ішінде талдықорғандық ақын Төлеужан Ғұмар мен Әмина Адайхан мүшелер қатарын толтырса, жазушы-журналист Нұрила Бектемірова халықаралы «Алаш» әдеби сыйлығының иегері атанды. Осындай шуақты сәттегі қуанышымен жерлестерімізді құттықтаймыз!
Қуат Қайранбаев
