Оқи отырыңыз
Еңбекшіқазақ аудандық ветеринариялық стансысында иттерге чип салу шарасы қолға алынды. Оған Алматы облыстық ветеринария басқармасы басшысының орынбасары Асхат Бәзілов бастаған мал дәрігерлері қатысты. Бұл туралы Алматы облыстық "Алатау арайы" газетінің тілшісі мәлімдеді.
Бұл әдістің тиімділігі, чип салу арқылы енді иттер жіті бақылауда болады. Барлық мәлімет «TANBA» ақпараттық базасында жинақталады. Жануарлар дер кезінде емдеуден өтті ме, қайда жүріп, қайда тұрады, иесі кім, басқа да жайлар электрондық төлқұжатта алақандағыдай анық көрсетіледі.
Аталған шарада мамандар жиналғандарға итке қалай чип салуды көрсетті. Иттің жауырын астын залаласыздандырып, ине салу арқылы ет пен терінің арасына чипті енгізді. Содан кейін сканер аппаратымен жануарды тексергенде оның реттік нөмірі анықталды. Бұл нөмір ортақ базаға алдын ала тіркелген. Міне, осындай әдіс қараусыз жүрген иттер туралы мәліметтің оп-оңай анықталуына септігін тигізеді.
Тиісті деректерге сүйенсек, облыс аумағында қаңғыбас иттер мен мысықтардың адамдарға жарақат салған оқиғалары аз емес. Бұған жол бермеу үшін аудан мен қаланың ветеринариялық стансылары жанынан ит аулайтын бригадалар құрылған. Ауланған иттер изолятор мен торларға қамалған. Иесі табылмаған жағдайда жойылып отырған.
Енді облыстық мәслихаттың 2022 жылғы 29 қарашадағы шешімі негізінде иттерді бақылау ісі жаңаша сипат алады.
- Биылғы жылдың 1 қыркүйегінен бастап иттер есепке алынады. Бүгін алдымен қаңғыбас иттерге чип салынды. Енді осы жұмыстар бейнеленген жазбаны барлық ауыл тұрғындарына таратамыз. Алдын ала түсіндірме жұмыстарын жүргіземіз. Сонымен қатар қабаған емес және ауруы жоқ қаңғыбас жануарларға кастрация жасалып, вакцина салынады, базаға енгізіліп, қайтадан жіберіледі, – деді аудандық ветеринария стансысының басшысы Еркін Биханов.
Облыстық полиция департаментінің ақпараты бойынша, өткен жылы заң талаптарын бұзғаны үшін 2381 жануар иесі әкімшілік жауапкершілікке тартылған. Олардан 14 миллион теңге өндірілген. Мәселе айыппұлмен ғана шектелмейді. Иттер тарапынан адам өміріне қауіп төнетін әрекеттерді барынша болдырмау үшін қолда бар мүмкіндіктерді толық қарастыру керек. Сондықтан жануарларды қорғау қоғамдары, облыстық полиция департаменті, облыстық білім басқармасы, орман шаруашылығы және жануарлар дүниесінің аумақтық инспекциясы, ветеринария басқармасы өзара бірлесе отырып жұмыс жоспарларын бекітті. Осы орайда сенім телефондары жолға қойылды. 8-705-552-04-56 нөмірі бойынша чат ашылғанын көпшілікке айта кеткеніміз жөн. Ең бастысы, ит баққан екенбіз, оған ие болуды да ұмытпайық.
Болат МӘЖИТ
Еңбекшіқазақ ауданы,
Алматы облысы
