Жалпыға ортақ жылдам желі

Уақыты: 28.09.2017
Оқылды: 1067
Бөлім: ЭКОНОМИКА

Еліміздің түкпір-түкпірі, барлық ауыл-аймақ  ғаламтор желісімен қамтылмақ.  Бұл болашақтың емес, бүгіннің ісі. 1700 ауылдың  тұрғындары ғаламторға қол жеткізбек. Бұл жайында ҚР Премьер-Министрі Бақытжан Сағынтаев өткізген селекторлық жиында айтылды. Ауылдық жер­лер­дегі білім беру және ден­саулық сақтау нысандарын кең жолақты ғаламтор желісімен қамтамасыз ету бойынша өткен Үкімет отырысына онлайн-режимде  облыс әкімі Амандық Баталовта қатысты.

Алғашқы болып сөз алған Ақпарат және коммуникация министрі  Дәурен Абаев ауыл-аймақтарды жоғары жылдамдықты ғаламтормен  қамту жайын толық тү­сін­дірді. «Цифрлы Қазақстан» жобасының аясында біраз жұмыстар атқару арқылы аталмыш тақырыпты шешу жолын да айтып өтті. Екінші болып сөз алған Ұлттық эко­но­мика министрі Тимур Сүлейменов ғаламтормен қамту барысында бюджетке біржолғы жүктемесіз мем­ле­кеттік жекеменшік әріптестік қағидасын пайдалану туралы шешім қабылдағанын көп­шілікке жеткізді. Бұл үшін сервистік келісімшарт мо­де­лін ұзақ мерзімді сатып алу таңдалған. Конкурсты жеңіп алған инвестор тоқсан сайын желілерді іске қосып, 1800-ге жуық ауылды жылдам желі­мен қамтамасыз етеді. Бұл жүйе үш жыл ішінде жүзеге аспақ.  Сол арқылы мемлекет 14 жыл ішін­де қызметтердің кепілденді­ріл­ген сатып алуын қамтамасыз етеді деп күтілуде. Үшінші сөз кезегі Білім және ғылым ми­нистрі Ерлан Саға­диевке бұйы­рып, ол бүгінде цифрлы оқыту­дың ел мектеп­терінің басым бөлігіне қол жетім­ді­лі­гін ай­тып өтті. Сон­дай-ақ, аталмыш ресурстың ішіне 80 мыңнан астам мате­риал, үш тілдегі интерактивті және мульти­медиялық сабақ­тар жә­не бей­не­көріністер бар екен­дігінен хабар берді. 

– Аталмыш ресурстар оқу процесін дамытпақ. Бірақ ол үшін жоғары жылдамдықты ғаламтордың керегі анық. Ал бүгінгі таңда секундына 4 мега­битпен таралатын кең жолақты желімен 98 пайыз мектептің тек 34 пайызы қам­тыл­ған. Сондықтан бұл жо­баны іске асыру білім дең­гейін көтермек, – деп сөзін қортындылады Ерлан Саға­диев. Денсаулық сақтау ми­нистрі Елжан Біртанов ауылд­ық елді мекендерде ға­ламтор­ға қолжетімділік мәсе­лесінің бар екенін мәлімдеді.  Оның айтуы бойынша елі­міз­де жал­пы саны 166 аудандық және ауылдық емхана бар. Соның  85 пайызы  желімен қамтыл­ған, дегенмен, 50-ден 800-ге дейін тұрғыны бар елді мекен­дерде  медпункттердің желіге қо­сылуы 4 пайызды ғана құ­райды. 

Кең жолақты ғаламторға 1700 нысанды қосу жоспарға қойылған. Осыған орай байла­ныс­тың басқа да тәсілдерін, телефон операторлары қыз­мет­­терін қолдану көзделген. Осы тақырып бойынша сөз алған «Қазақтелеком» АҚ бас­қарма төрағасы Қуанышбек Есекеев, Қызылорда облысы­ның әкімі Қырымбек Көшер­баев және Солтүстік Қазақ­стан облысының әкімі Құмар Ақсақалов ғаламторға байла­нысты баяндамаларын таныс­тырды.

Ай ниса.