Талдықорғанда әлеуметтік дүкен ашылды

Уақыты: 12.02.2024
Оқылды: 225
Бөлім: ЭКОНОМИКА

Бүгінде елдегі жалпы зат бағасы жаппай шарықтап, халықты қымбатшылық құрсауына алғаны еш жасырын емес.  Осыған байланысты Жетісу облысының орталығы Талдықорған қаласында тағы бір әлеуметтік дүкен ашылды.

«Жарық» деп аталатын бұл сауда орнын мемлекет пен кәсіпкерліктің әріптестігі қағидаттары негізінде «Жетісу» әлеуметтік-кәсіпкерлік корпорациясы мен  «Свет-Ко» ЖК бірлесіп ашқан. Ондағы 18 түрлі тауар бағасы нарықтык бағадан айтарлықтай арзан.

Нысанның ашылуында сөз алған Талдықорған қаласы әкімінің орынбасары Рүстем Бершімбеков сөредегі тауарлар өндірушілерден тікелей әкеліп сатылып жатқанын айтты. 

– Мұндағы сөрелерге тауарлар делдалсыз, өндірушілерден қосымша шығынсыз тікелей жеткізіледі. Бұл дүкендердің бәрі ӘКК-нің қаржыландыруында, сондықтан бұл олардың тауарларды нарықтағыдан төмен бағада сатуына мүмкіндік береді, - деді Р. Бершімбеков.

Қаладағы  «Самал» шағын ауданында орналасқан жаңа «Жарық» дүкеніндегі  тауарлардың түрі мол, сапалы болуымен құнды. Соның ішінде азық-түлік, тұрмыстық химия, сусындар тағы басқа да әлеуметтік маңызы бар 18 түрлі азық-түлік өнімі нарықтағыдан 15-20 пайызға төмен бағада саудаланады.

Мәселен, I санаттағы жұмыртқаның бағасы – 445, сұйық майдың бір литрі – 510 теңге болса, күріштің бір келісі – 340, картоп – 110, пияз – 70, сәбіз – 140 теңге.

 – Бұл бастама біріншіден, аймақтағы зат бағасының беталды шарықтап кетуінің алдын алса, екіншіден, тұрғындардың сапалы да таза азық-түліктерді тұтынуына мол мүмкіндік береді, - дейді жауаптылар.

Нысанды ашу салтанатында сөз алған Талдықорған қаласы әкімінің орынбасары Рүстем Бершімбековтың айтуынша, бүгінде облыс бойынша дәл осындай 6 әлеуметтік дүкен жұмыс істеп тұр. Оның   екеуі облыс орталығында.

Бұл әлеуметтік дүкендерді ашу облыс әкімдігінің бастамасымен, Талдықорған қаласы әкімдігі және «Жетісу» әлеуметтік-кәсіпкерлік корпорацияның бірлесіп қолға алған жоба.  Ал, осы жайлы да кең әлеуметтік дүкенді жабдықтап, жаңарту жұмыстарын «Жетісу» ӘКК мен «Свет-Ко» ЖК бүгінде сәтті аяқтаған.

Ол үшін керек деп тапқан нысанды күрделі жөндеуден өткізу арқылы барынша тиімлді әрі икемді етіп жасаған. Бұл өз кезегінде тұрғындардың іздеген керек-жарағын тез тауып, еркін жүріп-тұруына қолайлы жағдай туғызып отыр.

– Бұндай әлеуметтік дүкендердің көптеп ашылғаны халық үшін өте тиімді. Өздеріңіз білесіздер, қазір қара базарда да зат бағасы қымбат. Ал мұндай тиімді сауда нүктелері біз үшін қуана баратын орын болмақ. Тек қаланың өзінде көптеп ашылса екен, –  дейдіқала тұрғыны Аман Дүйсенбайұлы.

Әкімдік өкілдерінің айтуынша, өңірде әлеуметтік маңызы бар азық-түліктің бағасын тұрақтандыру тетіктерін іске асыру бойынша жүйелі және жоспарлы жұмыс жүргізіліп келеді.  Алдағы уақытта халыққа тиімді мұндай дүкендерді көптеп ашу жоспарда бар көрінеді.

 

                                                                               Айдын КӘЛІМХАН