Оқи отырыңыз
«Көлсай көлдері» ұлттық табиғи паркі мемлекеттік мекемесінің өз жұмысын бастағанына биыл – 15 жыл. Бүгінде БҰҰ-ның даму бағдарламасының демеушілігімен мемлекеттік инспекторларға смарт мобильді құрылғысы беріліп, олардың жұмыстары жаңа технология бойынша жетілдірілді.
Өңірдегі барлық жағдай дрон құрылғысы арқылы бақыланады. Бұл үшін арнайы мамандар оқытылып, дронды басқарады. «Ormankz» бағдарламасы арқылы инспекторлардың жұмысы жаңа электронды жүйеге көшті. Парк арқылы жылма-жыл жаз маусымында демалушыларға танымдық және экологиялық туризмді дамыту жағдайы қамтамасыз етіледі. Спорттық және әуесқойлық аңшылықпен, балықшылықпен айналысудың мүмкіндігі қарастырылады.
Табиғат аясы мен тарихи, археологиялық ескерткіштерге экскурсия ұйымдастырылады. Бұл аймақтар жалпыұлттық парк территориясының 13,5 пайызын құрайды. Мұндағы демалыс жаз маусымына тән. Көлсай көлдері, Қайыңды көл, Талды, Саты сайлары – келушілердің ең көп баратын жері. Көлсайға баратын жол қолға алынып, 3 жылдың ауқымында Алматы қаласынан Көлсай көліне дейінгі жол толық жөнделді. Мұның өзі келушілердің қатарын соңғы 2 жылда екі есеге арттырды.
Биыл Саты ауылынан Қайыңды көлі бағытына дейінгі автокөлік жолын жөндеу жұмысы басталды. Сонымен қатар, Қайыңды көліне дейін электр желісін тарту мәселесі Үкіметтің жоспарында бар. Қазіргі таңда ұлттық паркпен келісімшартқа отырған 13 туристік фирма жұмыс істейді. Экологиялық және танымдық туризмді дамыту мақсатында ұлттық парк аумағында туристер мен демалушыларға арналған 7 маршрут қызмет көрсетіп келеді. Атап айтқанда, «Саты ауылы – Қайыңды көлі», «Саты ауылы – Саты асуы», «Төменгі Көлсай көлі – Сарыбұлақ асуы», «Күрметі ауылы – Ортаңғы Көлсай көлі», «Күрметі ауылы – Қыземшек тауы», «Өрікті сайы – Мәжі көлі», «Төменгі Көлсай көлі» бағыттары жаяу және атпен жүруге арналған. Былтыр ЮНЕСКО «Көлсай көлдері» мемлекеттік ұлттық табиғи паркін дүниежүзілік биосфералық резерваттар желісіне қосты.
– Жыл сайын өңірде саябақтар шеруін өткіземіз. Өткен жылы бұл игі іс-шара Кеген ауылында жалғасын тапты. Республикадағы түрлі туристік фирмалармен байланыстамыз. Қайткен күнде де келушілерге қолайлы жағдай жасауға міндеттіміз, – дейді «Көлсай көлдері» ҰТП мемлекеттік мекемесі директорының туризм және ғылым жөніндегі орынбасары Әділхан Батанов.
Парк аумағында жаз маусымында жалпы сыйымдылығы мыңдаған адамға лайықталған Көлсай демалыс орны жұмыс істейді. Онда коттедждер мен жаздық үйлерде тұру қарастырылған. Қысқамерзімді пайдалану үшін жеке кәсіпкерлерге жыл сайын жаз кезінде 10 сотық жер беріледі. Мұның бәрі ұлттық парктің бас жоспарына сай жүргізіледі. Онда киіз үйлер тігіліп, ұлттық салт-дәстүр насихатталады. Төменгі Көлсайда 6 ескекті қайық, су көліктері бар. Салт атпен серуендеуге болады. Бұл жұмыстар Жалаңаш, Қарабұлақ, Саты, Күрметі өңірінің тұрғындары тарапынан атқарылатындықтан, елдің әл-ауқатын көтеруге септігі тиюде.
Қанат БІРЖАНСАЛ
Кеген ауданы
Алматы облысы
