Жетісу облысында көктемгі құс ату маусымы 25 наурыздан бастап ашылады. Қызығы – жылдық мөлшер есебінде 30 мың аталық үйрек атуға рұқсат берілген.
Экология және табиғи ресурстар министрлігі бұл өңірдегі аң-құс атуға бөлінген лимитті 13 наурызда бекітті.
Аталған құжат 10 күннен кейін заңды күшіне енеді. Жетісу облысына бөлінген жылдық лимит - 30 мың аталық үйрек. Соның 5 пайызы, яғни, 1,5 мың басы көктемгі құс ату маусымына арналған.
Нақтырақ айтқанда, жетісулық аңшылар үйрек атуға тек Наурыз мейрамынан кейін ғана шыға алады.
- Заңсыз құс ату дерегінің алдын алу үшін осылай рейдтік шаралар ұйымдастырып тұрамыз. Қаз-үйрек келе бастағанымен, аңшылық маусымы әлі ашылған жоқ. Сондықтан аңшыларды құс атуға шықпауға және қолданыстағы заң талаптарын қатаң сақтауға шақырамыз, - деді облыстық Орман шаруашылығы және жануарлар дүниесі аумақтық инспекциясының бас маманы Роман Коршунов.
Айта кетейік, заңда бекітілген мерзімнен бұрын үйрек заңсыз атылса шамамен 43 мың теңге айыппұл көзделген.
Фото: ғаламтордан
"ЖЕТІСУ" АҚПАРАТ