Оқи отырыңыз
ҚР Президентінің еліміздің бизнес-қоғамдастық өкілдерімен кездесуінің қорытындысы облыстық кәсіпкерлер палатасының өңірлік кеңесінде талқыланды.
Кәсіпкерлермен кездесу кезінде Мемлекет басшысы Қасым-Жомарт Тоқаев Жолдаудың негізгі аспектілерін еске салып, жүйелі мәселелер туралы айтып, Үкіметке бірқатар тапсырма берді. Сондай-ақ, бизнес үшін маңызды мессендждерді айтты. Ол экономиканың өсуі бизнестің жеке бастамаларын барынша қолдауға тікелей байланысты болатынына тағы да назар аудартып, мемлекет пен кәсіпкерлер арасында қоғамдық шарт жасасуға шақырды. Мемлекет пен бизнестің қарым-қатынасы өзара сенімге негізделуі керек, мемлекет жағдай жасайды, бизнес адал қызмет атқарады.
– Президенттің маңызды тезистерінің бірі – адал және патриоттық көзқарастағы бизнес біз үшін әрқашан құрметті және мемлекеттің қорғауында болады. Сондықтан кәсіпкер болуды таңдаған әрбір адам үшін бұл сөздер постулат болуы керек. Өз кезегінде Үкімет, жергілікті атқарушы органдар даму үшін жағдай жасауы тиіс, – дейді өңірлік кеңестің төрағасы Римма Салықова.
Қосымша құн салығы мөлшерлемесін 12-ден 16%-ға дейін көтеру мәселесі де назардан тыс қалған жоқ. Министрлік салық мөлшерлемесінің көтерілуі бюджетке қосымша түсімдер әкеледі және көрші елдерден жеткізілетін тауарлармен салыстырғанда отандық тауарлардың бәсекеге қабілеттілігін арттырады деп санайды. Алайда кәсіпкерлер ҚҚС мөлшерлемесінің өсуіне қарсы. Себебі, мұның бәрі тауар құнының көтерілуіне және инфляцияға әкеледі. Сонымен бірге шағын бизнестің дамуына кедергісін тигізеді. Шағын бизнес, оның ішінде шағын кәсіпкерлік «көлеңкеге» түсіп, заңсыз түрде жұмыс істейтін болады.
– Бұл жерде кәсіпкерлердің шынайы пікірлерін тыңдау маңызды. Қазіргі уақытта экономикалық тұрақсыздықты ескере отырып, бұл шешімді шұғыл түрде жою қажет деп санаймыз. Жеке кәсіпкер үшін бұл бизнестің толық құлдырауын білдіреді. Кәсіпкер не істеуі керек? Өз бизнесін сата ма немесе жаңа несие ала ма? Содан кейін жеке кәсіпкер де, оның қызметкерлері де жұмыссыздық бойынша есепке қою үшін әлеуметтік қамсыздандыруға бару керек пе? Бұл мемлекетке одан да үлкен күш түсірмей ме? Бұл туралы кім ойлады? – дейді өңірлік кеңестің мүшесі, салалық сауда кеңесінің төрағасы Эдиль Қазақпаев.
Айта кетейік, Салық кодексінің жаңа жобасы парламентке 2024 жылдың бірінші тоқсанында ұсынылады.
Айгүл Байжұмақызы
Фото: ашық дереккөзден
