Оқи отырыңыз
Облыс аумағындағы елді мекендерді табиғи газбен қамту мақсатындағы жұмыстардың нүктесі қойылар күн де жақындады. Міне, 260 шақырымға созылған «Алматы – Талдықорған» магистралі Шымыр ауылының маңынан салынатын «Талдықорған» газ қабылдау, тарату пунктіне 700 метр жерге жетіп тоқтады. Әрине, егіс алқаптарындағы өнімнің жиналмай тұрғаны кедергі келтірмесе, таяқ тастам жерге жеткен шаруа бітіп те қалар еді. Газ құбырын тартуға жауапты «Ақниет-БН» ЖШС құбыр төсеу жұмысын өнім жиналғанша тоқтата тұрып, «Талдықорған» газ қабылдау, тарату пунктінің құрылысын бастап кетті.
Облыстық энергетика және тұрғын үй-коммуналдық шаруашылық басқармасының тапсырысы, «КАТЭК» ЖШС-нің жобасы бойынша қаланы газдандыру «Ақниет-БН» ЖШС-не жүктелген. Аталған мердігер компания қаланы толықтай газбен қамтамасыз ету сынды ауқымды жобасын төрт кезеңге бөліп орындауды жоспарлап отыр.
Алғашқы кезеңде «Қаратал» шағын ауданы, Абылай хан, Жансүгіров, Гауһар ана көшелерінің бойындағы, облыстық аурухана, автобекет және орталық базар маңындағы жеке және көпқабатты тұрғын үйлер, «Талдықорған» индустриялды аймағы мен Оңтүстік өндірістік аймақты газ желісімен қамту мақсатында 6 қалаішілік газ қосу кешені және бірнеше газ реттеуші шағын пункттер салынады деп жоспарланған. Газ желісінің жалпы ұзындығы 331,1 шақырым, жалпы құны 6,141 млрд.теңгені құрап, 5237 көпқабатты үй, 8201 жеке секторға газ желісі тартылып, 41792 тұрғын газбен қамтылады.
Екінші кезеңде «Самал», «Жастар», «Мерейтой» шағын аудандары мен Жансүгіров, Желтоқсан, Қабанбай батыр, Чкалов, Белов, Шевченко көшелерінің бойындағы жеке және көпқабатты тұрғын үйлерге газ желісін тарту үшін 5 қалаішілік газ қосу кешені және бірнеше газ реттеуші шағын пункттер салынады. Газ желісінің ұзындығы 359,18 шақырым, құны 9,724 млрд.теңгені құрап, 20959 көпқабатты үй, 4298 жеке секторға газ желісі тартылып, 78750 тұрғын газ арқылы тұрмыстық қажеттілігін реттейтін болады.
Үшінші кезеңде Өтенай және «Шығыс» шағын ауданы мен Жансүгіров, Алматы, Тілек Әбжалиев көшесінің тұрғындарын газбен қамту үшін 6 қалаішілік газ қосу кешені мен бірнеше газ реттеуші пункттер жаңадан тұрғызылады. Газ желісінің ұзындығы 348,62 шақырым, құны 5,903 млрд. теңгені құрап, 2577 көпқабатты үй, 5853 жеке секторға газ желісі тартылып, 26218 тұрғын көгілдір отынға қол жеткізеді.
Төртінші кезеңде Қаратал өзенінің бойындағы, Еркін, Көктал ауылдары мен қала маңындағы саяжайларға газ жеткізу мақсатында 5 қалаішілік газ қосу кешені мен бірнеше газ реттеуші пункт салу жоспарланған. Газ желісінің ұзындығы 330,89 шақырым, құны 4,326 млрд. теңгені құрап, 212 көпқабатты үй, 7330 жеке секторға газ желісі тартылып, 23456 тұрғын табиғи газдың қызығын көреді.
Яғни, газ магистралінен келген жоғары қысымды газды «Талдықорған» газ қабылдау, бөлу пункті газ қысымын 2,0 МПа-ға дейін азайтады. Ал қалаішілік 22 газ қосу кешені 1,2 МПа-ға дейін төмендетіп, газ реттеуші құбырлар арқылы тұрғындардың көгілдір отынды қауіпсіз тұтынуын қамтамасыз етеді. Айта кетерлігі, газ құбырын тартуға, газ қабылдау, тарату пунктін тұрғызуға, газ қосу кешені, қалаішілік газ реттеуші шағын пункттерді салуға Ресейде өндірілген сапалы материалдар қолдануда.
