Оқи отырыңыз
«Нұр Отан» партиясы облыстық филиалының ғимаратында қоғамдық қабылдау өтіп, облыстық білім басқармасының басшысы Ләззат Базарқұлова азаматтарды жеке мәселесі бойынша қабылдады.
Бүгінгі күнгі өзекті мәселелердің бірі болып тұрған білім саласы бойынша сауалдар әр адамның көкейінде жүргені анық. Сондықтан да тұрғындардың облыстық білім басқармасы басшысына қоятын сауалдары аз болмады. Қоғамдық қабылдауға облыс бойынша бес адам тіркеліпті. Оның үшеуі арнайы басқарма басшысымен көзбе-көз тілдессе, екеуі онлайн режимінде байланысқа шықты.
Ләззат Тілеубайқызы Кербұлақ ауданы, Сарыөзек ауылынан келген Жанғазы Жексенбаевты қабылдады. Жанғазы Жұманұлын толғандырып жүрген мәселе, Кербұлақ ауданында өнер мектебін ашу. Күреңбел өңірі өнерлі таланттар қанат қаққан киелі мекеннің бірі. Міне, осы аймақта өнер мектебі жас жеткіншектерді құшағына басса деген сауалына тұшымды жауап алды. Басқарма басшысы бұл мәселе алдағы уақытта шешімін табатынын жеткізді. Облыс әкімінің назарына іліккен, бүгінгі таңда қаражаты да есептеліп, мәслихат шешімін тауып отыр. Аудан басшылығы жекеменшік ғимаратты тауып, жалға алу мәселесі де шешімін тапты дейді. «Өнер мектебін ұстап тұруға облыстық бюджеттен 29 млн. 460 мың теңге көлемінде қаражат есептелініп, мәслихат сессиясына ұсынып отырмыз және жыл аяғына дейін шешімін табады», – деп Жанғазы Жұманұлының сауалына нақты жауап берді. Одан кейін жасы жетпіс төрттен асқан Бақыт Дүйсенбаева апамыз немересінің оқу бітіретінін және спорттық жетістіктері көп екенін алға тартып, «ҰБТ- да қандайда бір жеңілдіктер бола ма?» деген сауал тастады. Көптеген халықаралық жарыста жеңімпаз атанып жүрген Аделя Дүйсембаеваны басқарма басшысы бірден таныды. Ендігі жерде боксшы қыздың оқуға түсуі тек болашақ талапкердің өз қолында екенін жеткізді. ҰБТ-да ешқандай жеңілдіктер болмайтынын және ол талапкердің өз білімі мен біліктілігіне байланысты екенін жете түсіндірді. Ал, информатика мамандығы дипломымен қаладан жұмыс сұрап келген Гүлмира Оқапқа бірден жұмыс табыла кеткен жоқ. Отбасылы Гүлмираны жас маман ретінде ауданға жібере алмады. Отбасылық жағдайға байланысты ваканциялық орын бар ауданға барудан өтініш білдірушінің өзі бас тартты. Қалалық мектептерде бос орын жоқ. Тек алдағы уақытта қаладан орын табылып қалар деген үмітпен тамыз айында тағы бір жолығуды ұсынды. Скайп арқылы байланысқа шыққан Талғар ауданының тұрғыны С. Үскібаева қызының дефектолог мамандығы бойынша оқуға барғысы келетіндігін және оған грант мәселесі қалай болатындығын сұрады. Бұл сауалға басқарма басшысы грант мәселесі өте қиын сауал, ол талапкердің ҰБТ-да алған балына байланысты екенін айтып, оның аз қамтылған отбасыға жатпайтындығын ескертті. Райымбек ауданынан Дариға Құрманбаеваның сауалы да өз шешімін тапты. Бүгінгі таңда ағылшын пәні мұғалімдері жетіспейді дегені шындыққа жанаспайды. Дәл қазіргі уақытта кадр мәселесі дұрыс жолға қойылған және ағылшын тілі пәнінің мұғалімдері толықтай жеткілікті екенін айтты. Екінші сауалы – оқушылардың кітап мәселесі. Бастауыш сыныптың оқулықтары өте ауыр, салмағы баланың жас ерекшелігіне келмейтінін айтты. Бұл сұраққа Ләззат Тілеубайқызы бастауыш сыныптың ата-анасы балаларын мектепке өздері әкеліп, өздері алып кетуі тиіс. Бұл заңды түрде қабылданған қағида және кітаптың салмағына қатысты мәселе келер жылы оңтайлы шешімін табады. Әр оқушының оқулығы әр тоқсанға бөлініп шығарылады. Сонда кітап салмағы төмендеп, балаға жеңіл болатынын айтты.
Келіп түскен сауалдардың барлығына басқарма басшысы толықтай жауап қайтарды.
Ришад ТҰРҒАНБАЕВ
