Оқи отырыңыз
Әлем елдерін жайлаған індет салдарынан білім беру жүйесі қашықтан оқытыла бастады. Алғашында біршама қиындық та орын алған еді. Уақыт өте келе олқылықтардың орны толықтырылып, кеткен кемшілік түзелді. Ұстаздар өздеріне артылған жауапкершілік жүгін толығымен арқалап, жақсы нәтиже көрсетіп келеді.
Қашықтан оқу дегеніміз – ақпараттық құралдар және ғылыми негізделген тәсілдер арқылы білім алу формасы. Ал қашықтан оқытуда екі компонент бар. Атап айтар болсақ, оқытуды басқару және өз бетімен білім алу. Бұл оқу формасында жаңа ақпараттық технологияларды барынша кеңінен қолданамыз. Өйткені, уақыт талабы солай болып тұр. Сонымен қатар, бүгінгі уақыт жаңа технологиялардың қарыштап дамыған заманы екенін естен шығармауымыз керек.
Осынау жаңа ақпараттық технологияларды сабақта қолдану арқылы оқушылар мынадай нәтижеге қол жеткізеді деп нық сеніммен айта аламыз: біріншіден, қашықтан оқыту форматында ақпараттық технологияларды пайдаланған оқушыларымыз өз бетімен тапсырманы орындайды. Олар өз бетімен көп ізденіп, жүйелі жұмыс жасау арқылы өз ойларын ашық жеткізуге ұмтылады. Тіл байлығы, сөздік қоры дамиды. Шығармашылық белсенділігін арттырып, ұжымда бірігіп жұмыс істеуге тәрбиеленеді. Өз бетімен білім алатын, ақпараттық технологияларды жақсы меңгерген, білімді жеке тұлғаны қалыптастырады.
Міне, онлайн оқудағы ақпараттық технологиялардың көмегі арқылы оқушы жан-жақты дамып, жаңа ақпараттық технологиялардың тілін жетік меңгереді. Ақпараттық технология жақсы дамығанымен ол оқытудың басты құралы болып есептелмейтінін ұмытпағанымыз жөн. Жаңа технологияны қолдану мұғалімдерге ізденуді, шығармашылық жұмыс жасауды, тәжірибелі ұстаздардың озық тәжірибелерімен танысуды және оның күнделікті өмірде қолдануды қажет етеді. Осының барлығын бір жүйеде біріктіре отырып, жаңа технологияларды әр сабақта пайдаланып, оқушыға жан-жақты білім беру – мұғалімнің негізгі міндетінің бірі.
«Қанша білсең, ізден тағы, тағы да, білікті адам жетер тілек, бағына» деген ғұлама Баласағұнның сөздерін өмірлік қағида ретінде ұстанамын. Себебі, іздену, жаңа технологияларды меңгеру арқылы ертеңгі еліміздің тізгінін ұстайтын білімді де білікті тұлға тәрбиелеп шығарсам, менің айқын мақсатымның орындалғаны деп білемін. Себебі, бүгінгі жас өрен - ертеңгі елдің болашағы.
Нұргүл НҮСІПХАНОВА,
Талдықорған қаласы бойынша білім бөлімі №2 орта мектеп коммуналдық мемлекеттік мекемесінің ағылшын тілі пәні мұғалімі
Алматы облысы
Сурет - ғаламтордан
