Оқи отырыңыз
ҚМА есірткі құралдары мен прекурсорлардың таралуы тұрғысынан Telegram мессенджерінің арналары, әлеуметтік желілер мен хабарландыру сервистері қамтылған жаһандық желіге мониторинг жүргізіп жатыр. Нәтижесінде мессенджерлердегі 300-ге жуық арна, тыйым салынған заттар сатылатын 4 ірі Darknet маркетплейс көзге түскен. Ол туралы ҚМА-ның баспасөз қызметі мәлім етті.
«Ел аумағында Telegram арналары арқылы есірткі және психотроптық заттарды тұрақты негізде жарнамалаумен және сатумен айналысқан 80 пайдаланушының жеке басы анықталды. Интернет-кеңістіктің Қазақстандық сегментіне жүргізілген мониторинг нәтижесінде 35 мыңға жуық қатысушысы бар есірткі сататын 3 ірі алаң, есірткі заттарынының әлеуетті тұтынушылары болып табылатын 10 мыңға жуық адамның жеке басы анықталды», — делінген хабарламада.
ҚМА хабарлауынша, нашақорлардың 50% астамы Астана мен Алматыда сондай-ақ Алматы облысына тиесілі.
Агенттік өткен жылы айналымы 25,6 млрд теңгені құрайтын 36 есірткі дүкенін анықтаған.
Биыл Telegram мессенджерінде 60 есірткі арнасына тиесілі 59 карт-шот анықталды.
«Қаржылық барлау бөлімшесінің алдын ала талдау қорытындысы бойынша аталған дүкендердегі ақша қаражатының жалпы айналымы 3 млрд теңгені құрады. Айналымы 82 млн теңгені құрайтын есірткі дүкендерінің бірі бойынша материалдар ІІМ-ге жолданды», — деп хабарлады ҚМА баспасөз қызметі.
ҚМА есірткіні қолдану адам денсаулығына жағымсыз әсер ететінін еске салады.
«Есірткі арқылы жасөспірімдердің денсаулығына қауіп төнуі мүмкін. Ата-аналардан балаңыздың мінез-құлқына, оның денсаулық жағдайына, айналасына назар аударып, интернет кеңістіктегі көріп жүрген контентін бақылап, жасаған сауда-саттығын сондай-ақ карточкалық шоттарына түскен қаражаттың көздерін бақылауды сұраймыз», - деп ескертті ҚМА.
Есірткі құралдарын сатып алу және сақтау үшін қылмыстық жауапкершілік қарастырылғанын еске саламыз.
Фото: Мұхтар Холдорбеков/Kazinform
