Оқи отырыңыз
Футзалдан кезекті ел чемпионы анықталатын тұс жақын. Араға үзіліс салып қайта құрылып, маусымға қосылған «Жетісу» - чемпионаттағы турнир кестесінде соңғы орын алып, плей-офф кезеңіне өтпеді. Команданың нәтижесіне шолу жасап, қорытындыласақ.
Маусым басында «Жастар» деген атпен шығып, кейіннен команданы «Жетісу» деп өзгертті. Ойыншыларды Асхат Алжақсин жаттықтырды. Құрамға тәжірибелі ойыншылармен қатар жергілікті жастар да қосылды. Жалғас Союз, Мәди Саматұлы, Нұржан Жеңісбеков, Дастан Мырзахметов, Еркебұлан Мұсабеков маусымдағы жетісудан шыққан жаңа есім есебінде көпшілікке танылды. Чемпионаттың ортасында талдықорғандық Арман Қаражанов та «Астанадан» ауысып келді. Одан тыс ұлттық құрамада ойнаған, футзалдағы карьерасын «Жетісудан» бастаған Болат Сарбасов, Жомарт Тоқаев, Нұрхан Байзақов та команданы өрге сүйреуге тырысты. Қазақстан жастар құрамасының ойыншысы 19 жастағы Ержан Кәрменов – командадағы жас ойыншы болды. Ол маусымда барлық ойынға қатысып, 7 гол салды. Ал біріншілікте ең көп гол салған – Нұрхан Байзақов (18 гол). Маусым ортасында қатарға қосылған тәжік Рустам Хамитов 18 ойында, 10 гол соғып, жанкүйер ықыласына бөленді. Жалпы «Жетісу» 36 ойында 81 гол салып, 173 гол жіберді. Үш ойында жеңіске жетсе, 7 кездесуді тең аяқтады. Жалпы ұпайы – 16. Алдында тұрған «Ордабасының» ұпайы – 27. Айырмашлық жермен көк. Маусым бойы командамызда ең көп ескерту қағазын алған – Болат Сарбасов (8 сары қағаз). Ал алаңнан бірден қуылған екі ойыншы бар – Ринат Өмешов пен Еркебұлан Мұсабеков. «Жетісу» чемпионатта тек үш ойында жеңіске жетті. Бұл чемпионаттағы жеңіске жету нәтижесі бойынша төменгі көрсеткіш. Жетісулықтар «Бәйтеректі» 3:2, «Рахметті» 5:2, «Каспийді» 3:2 есебімен жеңді. Жергілікті ойыншыларға басымдық бердік, отандық бапкерге сенім арттық. Бұл осы маусымдағы нәтижеге әсер еткен негізгі себеп. Қосымша команда ойыншылары кеш іріктеліп, оқу-жаттығу жай басталды.
Келер маусым биылғыдан да қызық болмақ. Өйткені, Семейден, Қызылордадан команда құрылып, жарысқа қатысуға ынталы. Ал «Жетісудың» келер маусымға қатысу, қатыспауы белгісіз.
Кез келген клубты ұйымдастырған адамның мақсаты – белгілі бір жетістікке жету. Менің түсінігімде клубты құрсаң – бюджетті жақсарту керек және бюджетке сай, жетістікке жетелей алатын ойыншыларды алу керек. «Жетісу» қандай мақсатта құрылды? Түсініксіз. Команда құрамын көрдім, ойыншыларды да білемін. Үштікке кіретін, болмаса жүктелген міндетті орындайтын құрам емес. Ал үдеден шығу үшін алған легионер мықты, бапкерің жақсы болу керек. Одан кейін команда ерте жиналып, ойыншыларға деген іріктеуді күшейту қажет. Жетісулықтардың ойынын көрдім, алып бара жатқан ештеңке байқамадым. Егер келесі маусымда жетістікке жетемін десе, жақсы легионер алып, ол бразилиялық болама, содан қосымша жергілікті ойыншылар арқылы күшейтсе болар еді.
Нұрсұлтан ҚҰРМАН
Журналист
