Оқи отырыңыз
Жаңа жыл жақындаған сайын жер-жерде қылқан жапырақты ағаш сатушылар қарасы да көбейе түсетіні шындық. Ал тұрғындардың жасанды шыршаны емес, көбінесе табиғи шыршаны таңдайтыны да рас. Сол себепті де жыл сайын орман сақшылары шыршаны заңсыз отаудан қорғау шараларын жүзеге асыру мақсатында күшейтілген режимде жұмыс істеуге көшеді.
Осыған орай, облыстық орман және аңшылық шаруашылығы аумақтық инспекциясы, «Іле-Алатау мемлекеттік табиғи қорығы» мемлекеттік мекемесінің қызметкерлерінен арнайы жедел топтар құрылып, шыршаны заңсыз кесуден қорғау іс-шаралары барысында қызмет атқарады. Олар сондай-ақ, жыл сайын облыс қалалары және елді мекендерінде жаңа жылдық шыршаларды сатумен айналысатын сауда нүктелеріне табиғат қорғау полициясы қызметкерлерімен бірлескен рейдтер жүргізеді.
Әрине, жаңа жылды орманнан келген әсем шыршамен қарсы алғанға не жетсін. Алайда бір күндік қызыққа бола жасыл шыршаны жаппай кесе берсек не болады? Шырша ағашы баяу өседі, ал адамдар көбіне енді-енді тамыр таратып келе жатқан жас қарағайларды кеседі. Ал сол кесілген ағашты бар болғаны бірнеше күн ғана пайдаланып, содан кейін лақтырып тастайды. Осы орайда еске сала кететін бір жайт, Қазақстан Республикасының заңдарында орман қорын күзету, қорғау, ормандарды молықтыру мен өсіру саласындағы заң бұзушылықтар үшін жауапкершілік белгіленген.
Жаңа жылды желеу етіп, қылқан жапырақтыларға балта сілтегендерге ел Үкіметінің 2007 жылғы 31 мамырдағы №441 қаулысына сәйкес шара қолданылады. Мәселен, бір шырша-қарағайдың обалына қалған адамға 15 айлық есептік көрсеткіш көлемінде, яғни 20 мың теңгеден астам айыппұл салынады. Ал тым шектен шығып, орманға орасан залал келтірген жағдайда құқық бұзушылар қылмыстық жауапкершілікке тартылады.
Жалпы, орманның «жасыл сұлуын» заңсыз отауға тек жаңа жыл қарсаңында ғана емес, жалпы жыл-он екі ай бойына қатаң тыйым салынады. Орманда өсіп тұрған ағаш та заңның қорғауында екенін ұмытпайық, ағайын!
Ең бастысы, қылқан жапырақты ағаштарды сақтай отырып, бәріміз бірге өлкемізді одан сайын көркейте түсейік. Осы үшін келер ұрпақ, бәлкім, бір кезде бізге алғысын білдірер.
Мәлік ДЕМЕСІНОВ,
облыстық орман шаруашылығы және жануарлар дүниесі аумақтық инспекциясының бас маманы.
Еңбекшіқазақ ауданы.
