Оқи отырыңыз
Еңбек және халықты әлеуметтік қорғау комитетінің Жетісу облыстық департаменті жыл басынан бері зейнетақы және әлеуметтік қамсыздандыру бойынша 14 мемлекеттік қызмет түрінен 36 768 қызмет көрсетті. Облыс бойынша 272 367 азаматқа ай сайын 15 млрд. 682 млн. теңгеден астам қаржы зейнетақы және әлеуметтік төлемдер үшін аударылуда.
«2024 – 2026 жылдарға арналған республикалық бюджет туралы» Қазақстан Республикасының Заңына өзгерістер мен толықтырулар енгізу туралы жобасына сәйкес 2024 жылғы 1 қаңтардан бастап зейнетақы және әлеуметтік төлемдердің көлемі артатынын хабарлаймыз. Атап айтсақ, жасы және еңбек сіңірген жылдары үшін зейнетақы төлемдерінің мөлшері 2024 жылғы 1 қаңтардан бастап 9 % - ға артады. Сондай-ақ, жасына байланысты жаңадан тағайындалған зейнетақы төлемдерінің мөлшерін есептеу үшін ескерілетін ең жоғары табыс 55 АЕК-ті (203 060 теңге) құрайды. 2024 жылғы 1 қаңтардан бастап зейнетақы жүйесіне қатысу өтілі 10 жыл және одан аз болғанда немесе болмағанда тиісті қаржы жылына «Республикалық бюджет туралы» Заңда белгіленген ең төменгі күнкөріс деңгейінің 65 пайызы зейнетақы жүйесіне қатысу өтілі 10 жылдан артық әрбір толық жыл үшін 2 пайызға арттырылады. Бірақ ең төменгі күнкөріс деңгейінің 105 пайызынан аспайтын мөлшерде беріледі.
Бұл – жаңа тағайындалған зейнеткерлер және 2024 жылғы 1 қаңтарға дейін зейнетке шыққандарға да қатысты. Мүгедектігі және асыраушысынан айырылуына байланысты мемлекеттік әлеуметтік жәрдемақылардың мөлшері, оның ішінде арнаулы әлеуметтік қызметтер көрсету орталықтарында тіркелген және түзеу мекемелеріндегі адамдар үшін Кодекстің 177 және 236-баптарында көзделгеніндей 2024 жылғы 1 қаңтарда ең төменгі күнкөріс деңгейі мөлшеріне берілетін қаржының ұлғаюына байланысты (43 407 теңге) көбейеді. Сонымен қатар, 2024 жылғы 1 қаңтардан бастап АЕК мөлшерінің артуына байланысты төмендегідей жәрдемақылар мен әлеуметтік төлемдер мөлшері көбейеді. Мысалы, №1 және №2 тізімдер бойынша мемлекеттік арнайы жәрдемақы, жерлеуге біржолғы төлем, бала тууға байланысты біржолғы мемлекеттік жәрдемақы, бала бір жарым жасқа толғанға дейін ай сайын төленетін жәрдемақы, оның күтіміне байланысты берілетін мемлекеттік жәрдемақы, кірісінен айырылуына байланысты МӘСҚ-тан әлеуметтік төлемдерді алушыларға міндетті зейнетақы жарналарын субсидиялау көлемі артады.
Кодекстің 190-бабының 3-тармағы 1, 17-тармақтарында қарастырылған арнаулы мемлекеттік жәрдемақы, бірге тұратын 4 және одан көп кәмелетке толмаған бала, оның ішінде 18 жасқа толғаннан кейін білім беру ұйымдарын тамамдайтын уақытқа дейін (жиырма үш жасқа толғанға дейін) жалпы орта, техникалық және кәсіптік, орта білімнен кейін, жоғары немесе жоғары оқу орнынан кейінгі білім беру ұйымдарында жалпы білім беретін немесе кәсіптік бағдарламалар бойынша күндізгі оқу нысаны бойынша білім алатын балалары бар көпбалалы отбасыларға берілетін ай сайынғы мемлекеттік жәрдемақы өседі. «Алтын алқа», «Күміс алқа» төсбелгілерімен наградталған немесе бұрын «Батыр ана» атағын алған, І және ІІ дәрежелі «Ана даңқы» орденімен наградталған көпбалалы аналарға берілетін ай сайынғы мемлекеттік жәрдемақы мөлшері көбейеді. Семей ядролық сынақ полигонындағы ядролық сынақтардан зардап шеккен азаматтар және жаппай Саяси қуғын-сүргiн құрбандарына тағайындалған, бірақ төленбеген бірреттік ақшалай өтемақы көлемі артады. Сондай-ақ, 2024 жылғы 1 қаңтардан бастап ЕТКД мөлшерінің артуына байланысты мүгедектігі бар баланы тәрбиелеп отырған ана немесе әке, бала асырап алушы, қорғаншыға тағайындалатын және төленетін ай сайынғы мемлекеттік жәрдемақы және бірінші топ мүгедектігі бар адамның күтушісіне берілетін мемлекеттік жәрдемақы мөлшерінің көлемі көтеріледі. Мұның барлығы елдің әлеуметтік жағдайын жақсартуға байланысты жасалып жатқан шара. Игілігін ел көрсін.
Зайда Илимжанова,
Еңбек және халықты әлеуметтік қорғау комитетінің
Жетісу облысы бойынша департамент басшысы
Фото: almaty.tv
