Оқи отырыңыз
Сыбайлас жемқорлыққа қарсы іс-қимыл агенттігі кезекті онлайн «Адалдық сағатын» аралас жекпе-жектен әлемнің үш дүркін чемпионы, кәсіби спортшы Ардақ Назаровпен өткізді. Бұл туралы аталған агенттіктің баспасөз қызметі хабарлады.
Бейнедәрістің кейіпкері спорттағы өмірін 1991 жылы грек-рим күресі секциясына келгеннен бастағанын айтты. А.Назаров спорт жолында грек-рим күресі, джиу-джитсу және панкратион бойынша аудандық, облыстық және республикалық жарыстарда жеңімпаз болып, жақсы нәтижелерге қол жеткізіп, көптеген спорттық жарыстардың тұғырында Қазақстанның Туын көтеріп жүлдегер атанған.
Сұхбат барысында атақты спортшы отбасы құндылығы, бірлік және өзара құрмет тақырыбында ойларымен бөлісіп, жастарды патриотизм мен парасаттылыққа шақырды.
Өз сөзінде ол: «Парасатты адам деп кемеліне жеткен, ақылы толысқан, дұрыс шешім қабылдай білетін, рухани түрде дамыған, даналықтың өнегесіне жеткен адамды айтамыз», – деп атап өтті.
А.Назаров жастардың кітап оқуға және өзін-өзі дамытуға деген қызығушылығын арттыру қажеттігіне ерекше назар аударды.
Ол өзінің барлық жеңістері мен жетістіктерін қажырлы еңбекпен байланыстырады. «Басқа спортшылар аптасына 3 рет жаттығып жатқанда, мен 13 рет жаттығу жасадым. Олар таңертең екі сағат дайындыққа уақыт бөлгенде, мен одан екі есе көп жұмыс істедім», - деді.
Бүгінде әлем чемпионы – көпшілік үшін үлгі. Әр кездесуде ол жастарды алға қойған мақсаттарына жету үшін аянбай еңбек етуге, үлкендерді құрметтеуге, Отанын сүюге және салауатты өмір салтын ұстануға шақырады.
«Адалдық сағаты» акциясы аясында Қазақстанның танымал тұлғаларын тарта отырып, жастар арасында парасаттылық идеологиясын ілгерілету жұмыстары жалғасатын болады.
Ардақ Назаровпен болған сұхбаттың бейненұсқасын осы сілтемеге өтіп, көре аласыз.
"ЖЕТІСУ-АҚПАРАТ"
Сурет - ғаламтордан
