Оқи отырыңыз
Жеңіс күнінде Алматы облысының әкімі Амандық БАТАЛОВ Талдықорған қаласындағы Отан соғысы ардагерлері Михаил Баранов пен Сәрсенбай Қаңтарбайдың шаңырағына барып, ардагерлерді құттықтап, мерекелік сыйлықтар тапсырды. Бұл туралы "Жетісу" газеті хабарлады.
Алғашқы кезекте І дәрежелі «Ұлы Отан соғысы» орденінің иегері Михаил Барановтың отбасында болған облыс басшысы:
- Михаил Васильевич, сізді шын жүректен Жеңіс күнімен құттықтаймын. Құрмет пен қошеметке әбден лайық жансыз. Өзіңіз сынды жауынгерлер Отанымызды жаудан қорғады. Бүгінде қатары сиреп қалған Отан соғысы ардагерлерін көру біз үшін үлкен қуаныш. Жүз жылдық мерейтойыңызға аман-есен жетуіңізді тілеймін, – деді.
Келесі кезекте облыс әкімі Отан соғысының ардагері Сәрсенбай Қаңтарбайдың шаңырағына бас сұғып, хал-жағдайын сұрап білді. Биыл 97 жасқа келген қария өздігінен жүріп тұрады, сөзі де, айтар ойы да анық. Қарияның әлі де тың екенін көріп ризашылығын жасыра алмаған Амандық Ғаббасұлы:
- Сізді көріп қатты қуанып отырмын. Әлі де тың екенсіз. Осы қалыпта 100-ге жетіңіз. Сіз сияқты облысымыздан соғысқа қатысқан 41 ардагер ғана қалды. Республика бойынша 660 ардагер бар. Елбасы да, Президентіміз де өздеріңізге ыстық ықыласын жеткізіп жатыр. Сіздердің арқаларыңызда бүгінде аспанымыз ашық, бейбітшілік заманда өмір сүріп жатырмыз. Індет жойылса, сіздің жүзге келген тойыңызды да тойлармыз. Адамның бақыты – ұрпақтары. Ұрпағыңызбен мың жасаңыз, – деп «Жаркент-Арасан» шипажайына жолдама табыс етті.
Сәрсенбай ата өткен күндерді еске алып, Бауыржан Момышұлымен соғыста бірге болғанын, Сағадат Нұрмағамбетовпен Түркменстанда офицерлік оқуды бірге оқығанын айтты.
- Жетпіс алты жыл Жеңіс күнін тойлап келген менің ешқандай арманым жоқ. 9 бала өсірдім. 25 немере, 45 шөберем бар. Әйелім былтыр өмірден өтті. «Күміс алқа», «Алтан алқа» медальдарын иеленді, – деді.
Бұдан соң облыс әкімі жетелей сыртқа шыққан қария өзіне деген үлкен құрметтің куәсі болды. Талдықорған қаласындағы №18404 әскери бөлімінің сарбаздары соғыс әуендерінен марш ойнаса, №14 орта мектеп-гимназиясының кадет класы «Жас полиция» тобының ұландары сап түзеп жүріп өтті.
Бұл қошеметке риза болған Сәрсенбай ақсақал: «Мұндай құрметті маршалдар ғана көретін еді. Осылай үйімнің ауласына келіп, мереке жасап беріп жатқандарыңа мың алғыс. Ата-бабаларымыз білектің күшімен, найзаның ұшымен байтақ жерімізді қорғады, солардың ұрпақтары екенімізді ұмытпайық. Баяғыда Бауыржан: «Артта Мәскеу, алдыда жау, бір қадам артқа шегінбеңдер», – деп команда беруші еді. Жас ұландар, қашанда ел қорғауға дайын болыңдар. Тыныш заман болсын! Даламыз, қаламыз құлпырып тұр, сендер де жарқырап жайнай беріңдер!» – деген тілегін жеткізді.
Сұрапыл соғыстың қарт сарбазы сөзінің соңында:
"Алла бастарыңа бақ берсін,
Астарыңа тақ берсін,
Қызырда жүрген Қыдырды
Үйлеріңе ап келсін", – деп ақ батасын берді.
Алма ЕСЕНБАЙ
Алматы облысы
