Оқи отырыңыз
Талдықорған қаласына қарасты Өтенай ауылының тұрғыны Өміртай Партияханұлы он саусағынан өнер тамған азаматтардың бірі. Бүгінде ол сол шеберлігінің арқасында үй жиһаздарының сан алуан түрін жасап, толағай табысқа кенеліп келеді. Кәсіпкер қарапайым еңбекқорлығының арқасында жақында ел Президенті Қасым-Жомарт Тоқаевтың арайы Алғыс хаты және Бауыржан Момышұлы атындағы «Батыр шапағаты» төсбелгісімен марапатталған.
Жастайынан тың жаңалық ашуға жаны құмар Өміртай Партияханның тума дарынына сай басты мамандығы сазгер. Ұлт аспаптарының тілін де еркін меңгерген. Бос уақытында ән салып, күй тартуға әуес.
Алайда өмір ағысы адам баласының ойлағанындай жарқын бола беруі беймәлім. Оның жас та болса өмір жолы бұралаң. Бар арқасүйер әкесі – Партияхан өмірден ерте , отбасының бар ауыртпашылығы жанашыр жалғыз анасына түседі. Сонымен Өміртайға орта мектепті бітіре салысымен жанұясының қиыншылығын анасымен бірге арқалауға тура келген.
Сол себепті, талапты жас Талдықорған қаласындағы арнайы кәсіптік оқу орыннан жиһаз жасау мамандығы бойынша біліктілігін шыңдап, ешкімге жалтақтамай қолында бар азын-аулақ қаражатымен кәсіп бастауға құлшынады. Артынша өздері жалға алып тұрған үйдің ауласынан шағын шеберхана ашып, тапсырыс қабылдап, ағаш жиһаздардың түр-түрін құрастыруды қолға алады.
«Көш жүре келе түзеледі» деген. Көп өтпей уақыттық қиындықтарды еңсерген жас шебер қолындағы кәсібінің де қыр-сырын еркін меңгеріп әкетеді. Кейін Талдықорған қалалық жұмыспен қамту және мәнсап орталықтарының қолдауында «Бастау Бизнес» жобасына қатысып, 1 миллион 200 мың теңгеден астам грант ұтып алып, шеберханасына заман талабына сай жаңа құрал-жабдықтар толықтырып, кәсібін жандандыра түсуге мүмкіндік алады.
– «Құдайға шүкір! Бүгінде кәсіпорынмыздың айналым қаражаты 2 жарым млрд теңгеден асады. Мұнда үй және мекемелерге керекті жиһаздардың түр-түрі құрастырылады. Талапқа сай қажетті материалдар ірі кәсіпкерлер арқылы Түркия, Ресей сынды мемлекеттерден сатып алынуда. Шығарылған затқа 10 жылға дейін сапа кепілдігін береміз. Сондықтан да біздің жиһаздарға сұраныс жоғары. Қазір Жетісу облысының әрбір ауыл, аудандары мен Текелі, Талдықорған қаласындағы жеке тұрғындардан және мектеп, балабақша, тағы басқа да мемлекеттік мекемелерден стол, орындық, киім ілетін жиһаздарға дейін тапсырыс жиі түсіп тұрады. Біздің басты ұстанымыз көптің көңілінен шығатын сапалы заттар шығару, - дейді кәсіпкер.
Қазір цехта 5-6 адам тұрақты жұмыспен қамтылған. Жалпы кейіпкеріміз осы кәсіпті алғаш қолға алған кезінде «Бастау Бизнес» жобасының көп көмегі тигенін айта келіп:
– Жоба жолымды ашты. Сол үшін бағдарлама аясында маған ақыл-кеңес беріп, жол нұсқаған азаматтарға айтар алғысым шексіз, – деп ризашылығын білдіреді.
Талдықорған қаласындағы мансап орталығы филиалының директоры Азамат Балтабековтің айтуынша, соңғы бірнеше жылдан бері аймақта біраз адам «Бастау Бизнес» жобасы бойынша грант ұтып алып, кәсіптерін дөңгелетуде. Солардың бірі де осы біз тілге тиек етіп отырған Өміртай Партияхан.
Өміртайдың ұстанымы сол – кәсіпкерлікті қолға алған әр азаматтың табысқа жетуі үшін табандылық қажет екенін айтады. Осылайша алдына үлкен мақсат қойған Өміртай өз шеберлігі мен табандылығының арқасында табысын еселеуде.
Осыған сәйкес, қазіргі кезде үкіметтің шағын және орта кәсіпкерлікті қолдауға бағытталған «Ауыл аманаты», осы «Бастау Бизнес» сынды жобалары бар. Мүндай бағдарламалар жаңадан қатарға қосылған кәсіпкерлерге үлкен көмек болып тұр.
Осы барыста «Бастау Бизнес» жобасы аясындағы грантқа қалай қол жеткізуге болады деген сұрақ туындайтыны сөзсіз. Мамандардың мәліметінше, аталған жоба шеңберінде грантқа ие болу үшін мынадай 5 шарт толық орындалуы тиіс.
Айдын КӘЛІМХАН.
