Оқи отырыңыз
Көкжиде ауылы аудан орталығынан шалғайда жатқан елді мекен. Сырқаттарды сонау жүз шақырым қашықтықта жатқан Сарқанға жеткізгенше біраз уақыт кетеді. Жол тауқыметі тағы бар. Ал, науқастың жағдайы ауыр болса, қауіп күшейе түседі. Сондықтан ауыл дәрігері Шынар Сатымбаева көп жағдайда өзіне, өзінің тәжірибесіне, білігіне сүйенеді.
Ауыл болған соң мұнда сала мамандары жоқ. Кез келген сырқатқа алғашқы медициналық көмекті өзі көрсетуге тура келеді. Аттан құлап жазым болған, жол-көлік апатына ұшыраған, зиянкес жәндік шаққан, денесіне аллергия шыққандар бірден жергілікті дәрігерге келеді. Мұндай жағдайда тосылып қалуға болмайды, тез және дұрыс шешім шығару керек. Жас дәрігер уақытпен санаспайды. Түн жарымында да көмек сұрап келгендерге ілесіп, сырқатқа көмектесуге асығады. Шынар Тоқтасынқызы әркімнің жан дүниесін зерттеуге мән береді. Бүгінде қан қысымының көтерілуі, жүрек- қантамыр сырқаты көптеп кездеседі. Дәрігер осы сырқаттардың көбі адамдардың уақытында демалмауы, дұрыс тамақтанбауы және күйгелектікке салынуынан болатынын жақсы біледі.
Науқастың жанына үңіліп, өзіңе тарта сөйлесең ішкі сырын ақтарады. Сонда тән ауруының неден бастау алғанына көз жеткізесің. Бүгінгі ел арасында белең алып отырған сырқаттардың көбі сабырсыздық салдарынан туындаған. Шым-шытырық өмір салты, түйіні шешілмей жүрген мәселелер ішкі арпалысты тудырады. Содан барып жүрекке, жүйкеге салмақ түседі. Ағзадағы қан айналым бұзылады. Сондықтан шамадан тыс күш жұмсамауға тырысу керек. Айналып келгенде, сабыр мен қанағатшылдық көп сырқаттың бетін қайтаруға негіз болады. Сырқаттың салдарын анықтаған соң емін табу да оңайға түседі.
Міне, ауылымызға келін боп келіп, елін емдеп, тынымсыз еңбек етіп келе жатқан Шынар Тоқтасынқызының ұстанымы осындай. Балалар дәрігері Шынар Тоқтасынқызы басқаратын дәрігерлік амбулаторияда бес медбике қызмет атқарады. Барлығы тәжірибелі, міндеттеріне жауапкершілікті. Олар өздеріне бөлініп берілген көшелердің тұрғындарын скринингтік тексеруден өткізіп, қауіпті сырқатпен тіркеуде тұрғандарын әлсін-әлсін қадағалап, жүкті әйелдерді назарда ұстайды. Балалардың екпесін салу, мүмкіндігі шектеулі жандарға барып ем-дом жасау да солардың міндеті.
Қателесуге мүлде болмайтын мамандық иесі Шынар Тоқтасынқызының меңгерушілікке келгеніне көп уақыт өтпесе де елдің ықыласына бөленіп, алғыс алуда. Абыройын асырған қасиет – халыққа көрсеткен қалтқысыз қызмет пен мамандығына деген адалдық.
Гүлжан Мұқашқызы.
Көкжиде ауылы,
Сарқан ауданы.
