Оқи отырыңыз
Талдықорғанда «Қызметкерлердің еңбек құқықтарын қорғау» тақырыбында пресс-тур ұйымдастырылып, облыстық Еңбек инспекциясы бойынша басқармасы мамандары мен БАҚ өкілдері «Темирбетон» ЖШС бетонды жəне темір-бетонды өнімдер мен жиналмалы конструкцияларды өндіретін зауытқа барды.
Зауыт өнімдері еліміздің энергетика саласын, темір жол қызметіндегі инфрақұрылым жабдығын жəне өнеркəсіптік- азаматтық құрылысты қамтиды. Өнімдер Ресей, Өзбекстан, Монғолия елдеріне де экспортталып келді.
Бүгінде кəсіпорнда 673 жұмыскер қызмет етеді. Кəсіпорын басшысы Азат Ерғалиевтың айтуынша, тоғыз айдың нəтижесі бойынша өндірістік персоналдың орташа еңбекақысы – 312 655 теңге. Өткен жылмен салыстырғанда, жұмыскерлердің еңбекақысы 24%-ға өскен.
Былтырдан бастап өндіріс технологияларын газбен жабдықтау арқылы жүргізу қолға алынуда. Кəсіпорнда жұмысшылардың жұмыс істеуіне барлық жағдай жасалған. Олар қажетті құрал-жабдықтармен, жеке қорғаныс құралдарымен, арнаулы киім жəне аяқ киіммен, жуыну жəне дезинфекциялау жабдығымен, нормативтерге сəйкес сүтпен қамтылған. Ұжымдық келісімшартқа сəйкес сыйақы төленіп келеді. Некеге отырғанда – 50 АЕК, балалы болғанда – 40 АЕК, жақын туысының қазасына – 50 АЕК, жұмыскердің қазасына – 70 АЕК мөлшерінде, жұмыскердің немесе жақын туысының ауыр науқастылығына байланысты 94 АЕК мөлшерінде материалдық көмек көрсетіледі.
Кəсіпорында Қауіпсіздік жəне еңбек қорғау бойынша Өндірістік кеңес, жеке еңбек дауларын шешетін келісімдік комиссия жұмыс атқарады. Бұлардың құрамы жұмыскерлермен қамтылған. Ауыр жəне зиянды жағдайда жұмыс жасаушыларға 6-12 күн қосымша еңбек демалысы беріледі. Қыстық мерзімде еңбекақыға 11% үстеме қосылады. 2023 жылдың он айында еңбекті қорғау шараларына 52 миллион 250 мың теңге қаражат жұмсалған.
Сонымен қатар, пресс-тур барысында «ТАЭТК» АҚ электр энергиясын беруді және таратуды жүзеге асыратын өңірлік электр желілік компаниясының жұмысымен танысқан тілшілер қызметкерлердің құқығы толықтай қорғалғанын еңбеккерлерден біліп қайтты.
Жетісу облысының 323 елді мекенінде орналасқан 195 мың абонентке, кернеуі 110/35/10 кВ 108 төмендететін қосалқы станциялар және 2018 бірлік 10/0,4 кВ кернеуліктегі трансформаторлық қосалқы станциялар арқылы жеткізілді. Кәсіпорын құрылымында 11 электр желілер ауданы, 8 қызмет және 19 бөлім бар. Бүгінгі күні кәсіпорнымызда 1 503 жұмысшы қызмет етеді.
Орташа жалақы 150 мың 207 теңге. “ТАЭТК” АҚ басшысы Айбек Күзембаевтың айтуынша, кəсіпорында жұмысшылардың жұмыс істеуге барынша жағдай жасалған. Кəсіподақ тарапынан əлеуметтік көмек көрсетіліп, жұмыскерлердің сауықтыру орнындарында тегін ем алуларына қаражат бөлінген. 2023 жылға еңбекті қорғауға 35 миллион 821 мың теңге қаражат бөлініп, электр қондырғыларында жəне электр желілерінде жұмыстардың қауіпсіз орындалуына жағдай қарастырылған. Бүгінгі таңда барлық бригадалар қорғаныс құралдарымен толығымен қамтамасыз етілген.
Облыстық Еңбек инспекциясы бойынша басқармасының мемлекеттік еңбек инспекторы Еркін Дəулетұлы биыл қызметкерлерден 405 өтініш түскенін айтты.
- Қараша айының басынан 53 тексеріс жүргізілген. Оның 9-ы құқық қорғау органдары тарапынан түскен шағым. Біз барлық өтініш негізінде жүйелі жұмыс жүргізіп келеміз. Біздің міндет - қызметкерлер құқығын қорғау”-, деді Еркін Дəулетұлы.
Еңлік КЕНЕБАЙ
