Оқи отырыңыз
Облыс әкімі Бейбіт Исабаев Польша Республикасы Парламентінің депутаты, «MOSCIBRODY ет комбинаты» отбасылық кәсіпорнының президенті Кшиштоф Борковскиймен кездесті. Жиынға облыс әкімінің бірінші орынбасары Әлібек Жақанбаев, облыс әкімінің орынбасары Әсет Қанағатов, кәсіпкерлік, ауылшаруашылығы және жер қатынастары саласындағы басқарма басшылары қатысты.
Аймақ басшысы Бейбіт Өксікбайұлы шетелдік компания өкілдеріне өңірдің инвестициялық мүмкіндіктерін айтып, инвесторлар үшін барлық жағдай қарастырылғанын жеткізді.
– Жетісу облыс жақында ғана құрылды. Бірақ біз өз әлеуетімізді ескере отырып, аймақтың экономикалық дамуын қалыптастырып, кәсіпкерлікті дамыту үшін барлық қажетті жағдайларды жасаудамыз. Агроөнеркәсіп кешені, көлік-логистика, туризм, баламалы энергетика мен өнеркәсіпті дамыту бағыттары бойынша нәтижелі жұмыс жүргізілуде. Біздің ең өзекті бағытымыз – облыстың транзиттік әлеуеті. «Батыс Еуропа – Батыс Қытай» трансконтиненталдық автожолы мен автодәлізі аймақ арқылы өтіп, жүкті Қытайдан Еуропаға 10 күнде жеткізуге мүмкіндік береді. Өңірдің көлік-логистикалық әлеуетін дамытуға географиялық тұрғыдан тиімді орналасқан «Қорғас – Шығыс қақпасы» еркін экономикалық аймағы ықпал етеді. Оның Құрамына құрғақ порт, жалпы ауданы 5 мыңға жуық логистикалық және индустриялық аймақтар кіреді. Оның 600 гектардан астамы инженерлік инфрақұрылыммен, сондай-ақ, «Алтынкөл» теміржол вокзалымен қамтамасыз етілген, – деді облыс басшысы.
Облыс басшысы өңірдің 2027 жылға дейін қалыптасқан инвестициялық қоржынында жалпы сомасы 3,2 триллион теңгені құрайтын және 11 мың жұмыс орны ашылатын 208 жоба жайлы айтып, аграрлық сектордағы, оның ішінде өсімдік және жануар текті ауылшаруашылық өнімдерін қайта өңдеу бойынша ұсыныстар қызықтыратынын жеткізді.
– Жер жаннаты Жетісу жері табиғи-климаттық жағдайы ауылшаруашылығының белсенді дамуына өте қолайлы. Бүгінгі таңда облыс ауылшаруашылығы саласында елеулі жетістіктерімен ерекшеленеді. Әсіресе, қант қызылшасын өсіруде біздің облыс алдыңғы қатардан көрінуде. Оған еліміздегі 4 қант зауытының 2 зауыты бізде орналасқандығы дәлел. Біз ауылшаруашылық өнімдерінің әртүрін экспортқа шығарамыз. Ауылшаруашылығы техникасын жаңарту саласында серіктестік мүмкіндіктер де бар. Облыста шағын және орта бизнесті дамытуға барынша қолайлы жағдай жасау мақсатында түрлі қолдау шаралары қолға алынуда, – деді Бейбіт Өксікбайұлы.
Жетісу облысының әлеуметтік-экономикалық дамуымен танысқан Кшиштоф Борковский ет комбинатын дамыту жоспарын тілге тиек етті. Ол халықаралық нарықты бағындырған серіктестігінің ауылшаруашылығы саласының дамуына зор үлес қосқанын, сондықтан өңірімізде ауқымды жобаларды жүзеге асыруға ниет білдіріпті. Компанияның негізін қалаушы Кшиштоф Борковский Жетісу өңірінің қолайлы климаты мен инвесторларға ұсынылып отырған мүмкіндіктің тиімділігін атап өтті. Шетелдік компания өңірде күркетауық фермасы мен ет комбинатын ашуға дайын.
– Жетісу – аграрлы аймақ екеніне көз жеткіздім. Кәсіп бастап, оны дамыту үшін барлық жағдайдың жасалғаны қуантады. Польшада 2 зауыт жұмыс істейді. Айта кету керек, «Стасин» серіктестігіне қарасты күркетауық фермалары, ет комбинаттары мен құс фабрикалары жылына 70 миллион келі ет өндіреді. Өндіруші етті 20-дан астам елге экспорттаймыз. Ендігі жоспар Қазақстан Республикасында оның ішінде Жетісу жерінде өнім шығару, – деді кәсіпкер.
– Біздің мақсатымыз – өңірді индустриялық тұрғыдан дамыту, бұл бизнесті жүргізуге қолайлы жағдай. Біздің инвестициялық мүмкіндіктеріміз өте жоғары, бізде кәсіпкерлік жобаларды қабылдауға толық мүмкіндік бар. Инвестиция саласындағы жемісті ынтымақтастықты кеңейтеміз деп үміттенеміз. Сіздің жобаларыңыз біздің өңірде жүзеге асса, қуанамыз, – деді облыс әкімі Бейбіт Исабаев.
Бұл ретте ол айтылған ұсыныстың өте салмақты екенін, сондықтан оған да байыпты қарау керектігін атап өтті. Ол үшін инвесторға өңірдің өнеркәсіптік әлеуетімен мұқият танысып, одан әрі ынтымақтастыққа қатысты түпкілікті шешім қабылдауға кеңес берді.
Еңлік КЕНЕБАЙ
Суретті түсірген Жеңіс Ысқабай
