Оқи отырыңыз
А.Байтұрсынұлының «Елді түзетуді бала оқыту ісін түзетуден бастау керек» деген сөзі бүгінгі күнде де маңызын жойған жоқ. Әр мемлекеттің болашағы оның жастарға берген білім мен тәрбие деңгейіне байланысты екенін уақыт дәлелдеуде. Сол сияқты білім беру жүйесі үнемі жаңғырып, жаңашаланып, заман талабына сай дамып отыруы тиіс.
Осы орайда әр баланы жеке тұлға деп қарастыратын лицейіміздің ұстаздары бала бойындағы дарынды ұштап, оның болашақта бәсекеге қабілетті тұлға болуына үлкен мән береді. Оқушылардың функционалдық сауаттылығын дамыту үшін жекеленген пәндерді тереңдете оқытып, үздіксіз білім алу құндылықтарын бойларына сіңіруге ықпал етеді. Лицейде сұранысқа ие білім мен дағдыларды беру, қоғамдық сананы жаңғырту, үштілділікті, сын тұрғысынан ойлауды қалыптастыру – әр педагогтың ұстанымына айналған.
Оқушылардың қабілетін ұштауда жаратылыстану-математика және гуманитарлық бағытында жүргізілетін пән академияларының маңызы зор. Әрбір шәкірт бейімділігіне қарай түрлі деңгейдегі олимпиадалар мен жоба жарыстарына қатысып, білімді өздігінен меңгеруге, ізденуге дағдыланады. Соның нәтижесінде өткен оқу жылында Дүниежүзілік «Ұлттық робототехника сайысы» санаты «Open Senior» конкурсында Элина Пак қола медаль еншіледі.
«Nazarbayev Fund Schools Challenge» авиамодельдеу конкурсының жүлдегерлері Д.Қанатұлы мен С.Нұғманов Ұлыбритания мемлекетінде «Авиация және ғарыш» мектебінде дәріс тыңдап, білімдерін толықтырды. Республикалық Президенттік олимпиадада Е.Ыбырай алтын, Е.Рахмолда қола медальді, «Зерде» шығармашылық ізденіс жұмыстары байқауында Т.Қалиев, Ж.Далабаева, Н.Серікжан, А.Азатқызы, Д.Сексенбаева, Ә.Шалқарұлы І және ІІ дәрежелі дипломдармен марапатталса, А.Қалдыбайұлы ғылыми жоба жарысының ІІ орын иегері болды.
Республикалық өзге ұлт өкілдері оқушыларына арналған қазақ тілі мен әдебиеті пәнінен «Тіл – тәуелсіздік символы» олимпиадасының ІІІ дәрежелі диплом иегері В.Бушуева қатарынан бірнеше рет олимпиада жеңімпазы атанған болатын. Облыстық пән олимпиадасында 36 оқушы, ғылыми жоба конкурсында 10, «Зерде» байқауында 14, математика олимпиадасында 6, география олимпиадасында 5 оқушы лицей қоржынын диплом, медальмен толықтырды. Облыстық пән олимпиадасы қорытындысы бойынша 9 «а» сыныбы «Ең үздік олимпиадалық команда» номинациясына, А.Қалдыбайұлы мен Е.Рахмолда Астана халықаралық университетінің AIU білім грантына ие болды.
ХХІ ғасыр ақпарат ғасыры болғандықтан адамзатқа компьютерлік сауаттылық қажет. Сауаттылықтың алғашқы баспалдағы мектептен басталады. Лицейіміз цифрлы технологиялық білім беруде замана көшінен қалмай келеді. Оның дәлелі шәкірттеріміз Д.Сексенбаева мен Ә.Шалқарұлы республикалық «KazRoboProjest-2020» конкурсынан І орынды, Б.Лышков, А.Ан, К.Гришин облыстық «Робототехника негіздері: теориядан практикаға дейін» атты көрмесінде ІІ орынды иеленді. Бүгінгі таңда 118 оқушы «Intellection Studio» орталығының «Wunder» бағдарламалау мектебінде онлайн негізде оқып жатыр.
«Ұлттық өнертапқыштыққа алғашқы қадам» инновациялық идеялардың облыстық байқауында 5 оқушы І дәрежелі дипломға ие болып, республикалық кезеңге жолдама алды. «Swiss American Academy SA» компаниясының «Инновация және заманауи технологиялар Халықаралық «imt-class» жобасы бойынша 66 оқушы ағылшын тілін меңгерудегі білімдерінің жоғары деңгейде екенін көрсетті.
Қазіргі жағдайға байланысты қашықтан оқу кезінде жалпы білім беретін пәндер бойынша республикалық «Дарын» ғылыми-практикалық орталығының олимпиадасында 311 оқушы жүлделі орынға ие болды. Әр оқушы үшін «Бүгінгі табысты оқушы – болашақта табысты азамат» қағидасы ұранына айналып, жеңістерін үлкен жиында «Қызыл кілеммен жүріп өту», әлеуметтік желіде "Олимп шыңы" эстафетасын жалғастырамыз" айдарымен құрметтеу, оларды басқаға үлгі ету оқушылардың бойында ерекше ұмтылыс пен жаңаша көзқарас туғызады.
Өйткені, бүгінгі күннің басты талаптарының бірі – даму. Осыған орай, өз білімін ұстазының жетелеуімен тұрақты, жүйелі, шынайы түрде дамытып отырған лицейіміздің әрбір оқушысы болашақта бәсекеге қабілетті, белсенді, АКТ-ны меңгерген, мәдениетті, өзін де, өзгені де сыйлай білетін, ісіне адал, коммуникативті тұлға болып қалыптасатынына сенімдіміз.
Г. РАЕВА,
№20 дарынды балаларға арналған үш тілде оқытатын арнаулы лицейдің менеджері
Талдықорған қаласы
Сурет - ғаламтордан
