Оқи отырыңыз
Мемлекет басшысы Қасым-Жомарт ТОҚАЕВ ауылдағы денсаулық сақтау саласын жаңғыртудың маңыздылығына тоқталды. Бұл тапсырма Көксу ауданында мінсіз атқарылуда. Оған Мұқаншы, 10 жылдық Қазақстан және Ақтекше ауылында ашылған блокты-модульді медициналық пунктер нақты дәлел.
346 тұрғыны бар Мұқаншы ауылында жаңа нысанның лентасы қиылды. Құрылыс жұмысын мердігер «Kaz Damu Construction» ЖШС-і небәрі 3 айдың ішінде аяқтаған. Ауылда ашылған блокты-модульді медициналық пункт ғимаратының жалпы ауданы 108 шаршы метр. Медициналық пунктінің қуаттылығы ауысымына 15 келушіні қабылдайды. Тіркелген тұрғындарға алғашқы медициналық- санитарлық көмек көрсету үшін қажетті жабдықтардың барлығы қарастырылған. Халық игілігіне берілген нысанда модульді-акушерлік кресло, тоңазытқыш, компьютер, стерилизатор, бой өлшегіш, салмақ өлшегіш, тонометрлер, кушеткалар, блокты-модульді медициналық стол мен шкафтар қарастырылған. Штаттық кестеге сәйкес бұл нысанда 1 орта буын медициналық қызметкері мен тазалықшы жұмыс істейді.
Аудан орталығынан 13 шақырым жерде орналасқан 10 жылдық Қазақстан ауылында да блокты-модульды медициналық пункті пайдалануға берілді. Жаңа медициналық нысанда 2 орта буын медициналық қызметкер және тазалықшы қызмет көрсетеді.
Шалғай орналасқан Ақтекше ауылында блокты-модульді фельдшерлік-акушерлік пункті ел игілігі үшін есігін айқара ашты. Жаңа нысанның қуаттылығы ауысымына 20 келушіні қабылдай алады. Тіркелген тұрғындарға алғашқы медициналық-санитарлық көмек көрсету үшін қажетті медициналық құрал-жабдықпен толықтай қамтылған. Штаттық кесте бойынша 3 орта буын медициналық қызметкер және тазалықшы, күзетші, жүргізуші қызмет етеді.
– Денсаулықтың қадірін ауырмас бұрын ойлау керек. Дені сау елдің болашағы да жарқын болмақ. Осыны алға тартқан ел ағалары ауылымызда заман талабына сай жақсы ғимарат салып берді. Бас ауырып, балтыр сыздай қалса аудан орталығына шапқыламай-ақ ауылымыздағы ақ халаттылардың көмегіне жүгінеміз. Бізге осындай жағдай жасаған мемлекетімізге зор алғыс айтамыз, - дейді Ақтекше ауылының тұрғыны Марал Ахметова.
Жалпы, аудан тұрғындарына мамандандырылған медициналық көмектің қол жетілімдігін қамтамасыз ету барысында аптасына 2 рет аудандық емхана дәрігері қабылдау жүргізеді. Жылжымалы медициналық кешен арқылы қажетті мамандардан құрылған топ, яғни, кардиолог, гинеколог, онколог, хирург, лаборант, рентген-лаборант, ультрадыбыстық зерттеу маманы арнайы кесте бойынша ауылдарға келіп, тұрғындарға мамандандырылған медициналық қызметті тегін көрсетеді.
Келісім шартқа сәйкес әрбір нысанға 32984,0 мың теңге қарастырылған.
Еңлік Кенебай
Суертті түсірген Руслан Қадіров
