Оқи отырыңыз
Тіл жансызды жандандырады, әлсізге күш береді, мықтыны ойсыратады... Иә, кішкентай кезімде теледидар экранынан тілшілердің жұмысына көз салып, оларға кызыға қарап, тәтті қиялға батып, үлгі тұтушы едім. Ол кездерде мамандық таңдау дегенді білмедік те. Өсе келе, сол таңдау сәті келгенде «мамандық өмірлік сенің бейнең» деп өзіме жігер бере түстім. Айналамдағы адамдарға, қоғам дамуына қолұшым тисін деген оймен жоғары оқу орны қабырғасынан тілшілік жолына деген алғашқы қадамымды бастым. Көңілде қорқыныштан да қызығушылық басым. Тілші мамандығының қыр-сырымен таныса түсіп, алғаш рет сұхбат алып, шыңдалу үрдісін бастадым. Осы бағыттағы талпынысым жаман емес, тәрізді.
Талпынысымның тағы бір жарқын қадамына «Жетісу» газетінің ұжымы ықпал етті. «Жетісу» өзіндік қолтаңбасы, жүз жылдық тарихы бар толайым жетістіктер ауылынан қол бұлғаған ата басылым.
Айтары көп ата басылым облыстық газеттер арасынан республикалық «Үркер» сыйлығына тұңғыш рет ие болған екен. Ал біз секілді жас талапкерлердің үркер шоқжұлдызы жымыңдаған биікке үміттене қол созатынымыз анық.
Маңдайында жұлдызы, бауырында үркері бар «Жетісу» газетінде практикалық жұмысты өткізу мен үшін үлкен мәртебе. Газетке алғаш келген кезімде сәл қобалжығаным рас. Мұндай үлкен ұжымды көрмеген бала жүрек толқып сала берді. Бірақ ғимарат ішіндегі жылулық келген жанды құшағына басатындай. Менмұндалап, қолыңнан жетелеп, бауырына басып әкететіндей.
Осындай жылылық менің бойымдағы қорқынышты сейілтіп, газеттің тірлігіне еркін араласуға мүмкіндік берді. Редакция газет шығаратын мекеме ғана емес, нағыз талантты тұлғаны тәрбиелеп, бойыңды шабытқа толтырып шыңдайтын ұстахана. Билік пен бұқараның арасындағы алтын көпір ғана емес, жас журналистердің де жебеушісі екенін жете ұғындым.
Бүкіл ойыңды жинақтап ақ бетіне түсіру – бұл ерекше сезім. Мың сөз, мың ойдың ішінен бүтін бір дүние құрап шығару, міне басты мақсат.
Газет бетіне алғаш мақалам шыққан сәтте төбем көкке жетті. Бұл мен үшін үлкен жетістік. Бүгінгі кіші қадам – ертеңгі биік белес. Меніңше, журналист басқаға ұқсамайтын, өзгелерден озық тұратын ерекше бекзада мамандық. Сондай-ақ БАҚ саласында қызмет етіп жатқан барлық тілші қауымын, мен тәрізді тілшілікке қол созған замандастарымды журналистер күнімен шын жүректен құттықтаймын! Кәсіпке адалдық танытып, қоғамның дамуына үлес қосып, жаңа идеялар мен жобаларды жүзеге асыру жолында аянбай еңбек етейік.
Назым НҰРӘДІЛ,
І. Жансүгіров атындағы ЖУ-дің 3-курс студенті
