Оқи отырыңыз
Талдықорған қаласындағы көпқабатты үйлер табиғи газға қосыла бастады. «ГазТрансГазАймақ» АҚ облыстық өндірістік филиалының ақпараты бойынша, бүгінгі таңда облыс орталығындағы 2518 жеке тұрғын үй және 5 көпқабатты тұрғын үй табиғи газға қосылып, оның игілігін тұрғындар көре бастады. Енді олар осыдан былай көгілдір отынға бұрынғыдан 15 есе арзан бағада төлем жасайтын болады. Табиғи газды тұтынудың ең басты артықшылығы – бағаның арзандығы.
– Біз осыған дейін сұйытылған газдың әр текше метріне 450 теңгеден төлеп келген едік. Табиғи газға қосылғалы бар-жоғы 29 теңге төлейміз. Осындай игілікті көптен бері күтіп едік. Міне, соған да жеттік, – дейді Қаратал шағынауданы, 43 «В» үйдің тұрғыны Клара Өтеулинова.
Осы уақытқа дейін қаладағы көпқабатты тұрғын үйлерді табиғи газға көшіру мәселесі шешілмей келген болатын. Бұл мәселе өткен жылы облыстық мәслихат тарапынан да көтерілді. «ГазТрансГазАймақ» АҚ облыстық өндірістік филиалында бұл мәселені бірнеше рет көтерді. Тіпті, осы жылдың басында БАҚ өкілдерімен арнайы брифинг өткізіп, көпқабатты тұрғын үйлерді табиғи газға көшіруге қатысты келеңсіздіктерді жан-жақты талқылады. Міне, сондай жұмыстардың нәтижесінде көпқабатты үйлерді сұйытылған газдан табиғи газға ауыстыру жұмысы жандана бастады.
– Бүгінде Талдықорған қаласындағы көпқабатты тұрғын үйлерде 32 мыңнан астам тұрғын тұрады. Алдағы уақытта соның бәрін табиғи газға қосу жұмысы жүргізіледі. Осы жылдың соңына дейін қаладағы 100-ге жуық көпқабатты үйді табиғи газға қосамыз деген жоспар бар, – дейді «ГазТрансГазАймақ» АҚ облыстық өндірістік филиалының директоры Жайық Әлішев.
Сұйытылған газдан табиғи газға ауысу да оңай емес. Ол үшін тұрғындар «ГазТрансГазАймақ» АҚ облыстық өндірістік филиалымен келісімшарт жасасуы керек. Одан соң әрбір пәтер иесі ішкі газ құбыры болған жағдайда газ ошақтардың құрылымын өзгерту үшін 10-15 мың теңге төлем төлеуі керек.
– Көпқабатты тұрғын үйлерге газ ошағын орнату және пайдалану арнайы қауіпсіздік ережелерін сақтауды талап етеді. Газ ошағы орнатылатын бөлменің биіктігі 2,2 метрден кем емес, терезесі бар және еркін ашылып, жабылатын болуы керек. Сондай-ақ, тұрғын үйдің көлеміне сай газ ошақтарды дұрыс таңдаған жөн, – дейді «ГазТрансГазАймақ» АҚ облыстық өндірістік филиалының газға қосу бригадасының маманы Абылайхан Жайықов.
Демек, көп кешікпей қалалықтар толықтай табиғи газдың игілігін көретін болады.
Қажет АНДАС
