Оқи отырыңыз
Жыл соңына дейін облыс тұрғындарын газдандыру мөлшері 62 пайызға жетеді. Сондай-ақ, көпбалалы және тұрмысы төмен отбасыларын газға тегін қосу үшін облыстық бюджеттен 500 миллион теңге бөлініп отыр. Оны атқарудың механизмі қарастырылуда. Бұл туралы облыс әкімінің орынбасары Айдарбек БАЙЖАНОВТЫҢ төрағалығымен өткен аймақтағы газдандыру жағдайына қатысты жиында айтылды.
Шарада үш негізгі мәселе қаралды. Алдымен көпшілік аймақты газдандырудың барысы мен ондағы сақталған мәселелер төңірегінде облыстық энергетика және тұрғын үй-коммуналдық шаруашылығы басқармасының басшысы Айдар Беркімбаевтың баяндамасын тыңдап, сол төңіректе туындаған сұрақтарға жауап алды. Келесі кезекте инвестициялық меморандум барысындағы міндеттелемелерді орындау жоспары қаралып, облыстағы көпбалалы және жағдайы төмен отбасыларын газға тегін қосу мәселесі сөз болды.
Соңында Талдықорған қаласындағы абоненттердің газға қосылу барысы туралы «ҚазТрансГазАймақ» АҚ Жетісу өндірістік филиалының директоры Жайық Әлішевтің есебі тыңдалып, алдағы жұмыс жоспары мен күтілетін нәтиже тиянақталды.
Жиын барысында басқарма басшысы Айдар Беркімбаев бүгінгі таңда облыс бойынша газдандыру деңгейі 30 пайызға жетіп, газдандырудың үш кезеңге бөлінген жұмыс жоспары өз ретімен, белгіленген тәртіп бойынша атқарылып келе жатқанын тілге тиек етті. Айта кетерлігі, биыл аймақтағы газға қосылатын обаненттердің саны арта түседі. Бұл жайлы Айдарбек Естебекұлы: «Жұмыс нәтижесі көрсеткендей, осы жылдың соңында тұрғындардың газға қосылу көрсеткіші 62 пайызға жетеді», – деді.
Талдықорған қаласын газдандырудағы жұмыс қарқынды. Айталық, бүгінгі таңда облыс орталығында газбен 1 және 2 кезекте газдандыру желісіне қосылған абоненттер газбен қамтамасыз етілген. Газбен жабдықтау жүйесіне 2500-ден астам тұрғын үй және көпқабатты тұрғын үйлердің 129 пәтері қосылған.
– Ағымдағы жылы Талдықорған қаласында 6000 тұрғын үй табиғи газға қосылады деп күтілуде. Оның 12 айлық жоспары жасалып, қаңтар айындағы жоспар толық орындалса, ақпан айында газға қосылуға тиісті 100 үйдің 97-сі көгілдір отынның қызығын көрді. Алдағы айлардағы жоспар да өз деңгейінде орындалады, – деп сенім білдірді «ҚазТрансГазАймақ» АҚ Жетісу өндірістік филиалының директоры Жайық Әлішев.
Панфилов, Еңбекшіқазақ, Балқаш, Көксу аудандары мен Қапшағай қаласында газ қабылдау-тарату пункттері салынып, газ жіберілді. Алдағы уақытта Қаратал ауданында осындай пункт салынады. Ақсу, Сарқан, Алакөл, Райымбек, Кеген аудандарын газдандыру жұмысының жобалық- сметалық жоспары жасалуда. Өкінішке қарай, Ескелді, Көксу аудандары мен Текелі қаласында тұрғын үйді газға қосу көрсеткіші төмен. Тіпті, Текелі қаласының тұрғын үйлерін газға қосуды міндетіне алған инвестициялық компания жұртқа құрғақ уәде беріп, бітер істі кешіктіріп келе жатқаны белгілі болды. Бұл мәселеге айрықша назар аударған Айдарбек Естебекұлы компания өкілдеріне келесі аптаның бірінші күніне дейін орын алған кемшілікті түзетуді тапсырды.
Қажет АНДАС
